Ի՞նչ է սպասվում Արարատ Միրզոյանին Մոսկվայում
ՎԵՐԼՈՒԾՈՒԹՅՈՒՆՆԵՐ
Հունվարի 21-ին Հայաստանի արտգործնախարար Արարատ Միրզոյանն աշխատանքային այցով կգտնվի Մոսկվայում։ ՀՀ ԱԳՆ փոխանցմամբ, նախատեսված է Արարատ Միրզոյանի հանդիպումը Սերգեյ Լավրովի հետ, որից հետո նախարարները հանդես կգան համատեղ մամուլի ասուլիսով։
Ռուսաստանի ԱԳՆ-ի հաղորդագրության համաձայն՝ Լավրով-Միրզոյան հանդիպման օրակարգում նաև ԵԱՏՄ-ի շրջանակներում համագործակցության հարցն է:
- «Արտաքին քաղաքականության գերատեսչությունների ղեկավարները մտքերի հանգամանալից փոխանակում կանցկացնեն ռուս-հայկական հարաբերությունների ողջ շրջանակի, ԵԱՏՄ-ի և եվրասիական տարածքում ինտեգրացիոն այլ ասոցիացիաների շրջանակներում համագործակցության և համաշխարհային օրակարգի արդի թեմաների շուրջ», - ասված է ռուսական կողմի հաղորդագրությունում։ Նշվում է, որ հանդիպման ուշադրության կենտրոնում կլինի նաև Հարավային Կովկասում տիրող իրավիճակը՝ Հայաստանի և Ադրբեջանի միջև հավասարակշռված կարգավորման հասնելու շեշտադրմամբ։
Միրզոյանի այցի մասին օրերս հայտարարել էր ինքը՝ Սերգեյ Լավրովը։ Բոլորովին զարմանալի չէ, որ Միրզոյանը համաձայնվել է մեկնել Մոսկվա, թեպետ անցած տարիներին մի քանի անգամ կտրուկ մերժել է։ ԵԱՏՄ-ից Հայաստանին վռնդելու սպառնալիքները բոլորովին էլ ֆիկցիա չեն, իշխանությունները հասկանում են, որ դա լուրջ վտանգ է ներկայացնում, թեպետ չեն կարող այլ կերպ շարունակել իրենց քաղաքականությունը։
Նախօրեին Պուտինի հետ հեռախոսազրույցում Փաշինյանն է չքմեղացել, այժմ էլ ԱԳ նախարարին է ուղարկում՝ հանգստացնելու ռուսական կողմին։ Թե որքանո՞վ դա կհաջողվի, բարդ է ասել։
Նարե Մարգարյան
