Շարունակում է խաբել ու մանիպուլյացիայի դիմել. «Փաստ»

«Փաստ» օրաթերթը գրում է.

blocknot.ru-ն «Փաշինյանի խարդախությունը. Հայաստանում նշել են իրենց վարչապետի՝ ԵՄ գնալու իրական պատճառը» վերնագրով հոդվածում գրում է, որ Հայաստանում մեկնարկել է Եվրամիությանն անդամակցելու ընթացակարգը: Միաժամանակ, համապատասխան օրինագիծը նախաձեռնող կառավարության ղեկավար Նիկոլ Փաշինյանը խոստացել է, որ հարցը կդրվի հանրաքվեի, քանի որ կարևոր է իմանալ մարդկանց կարծիքն այդ հարցում։ Սակայն մի շարք փորձագետներ, այդ թվում՝ հենց Հայաստանի, բացահայտել են այն, թե ո՞րն է վարչապետի կողմից ԵՄ-ի թեման «գործարկելու» իրական պատճառը:

Իրականում Բրյուսելը խոսում է միայն «մերձեցման» մասին և ոչ ավելին։ Սակայն դեռ 2024 թվականի մայիսին Փաշինյանը ազգային լրատվամիջոցներին տված հարցազրույցում ասել էր, որ պատրաստ է հանրապետությունը տանել Եվրամիություն։ Եվ նա նույնիսկ խոստացել էր դա անել 2024 թվականին։ Ճիշտ է, այն ժամանակ դա ասվել էր կատակի տեսքով: Մինչդեռ վերջերս կառավարության նիստում, որտեղ հայտարարվեց ԵՄ անդամակցության գործընթացի մեկնարկի մասին, ԱԳ նախարար Արարատ Միրզոյանը ներկայացրել է ԵՄ-ին երկրի անդամակցության նախագիծը։ Եվ նա նույնիսկ նշել է այն հանգամանքները, որոնք դեր են խաղացել նախագծի զարգացման գործում: Դրանք են Հայաստանի և ԵՄ-ի միջև տարբեր ոլորտներում հարաբերությունների դինամիկ զարգացումը, Երևանում ԵՄ քաղաքացիական դիտորդական առաքելության առկայությունը, որն աջակցում է հանրապետությունում ժողովրդավարությանը: Բացի այդ, ԵՄ-ն ցույց է տվել, որ պատրաստ է օգնել Հայաստանի տնտեսական կայունության ամրապնդմանը:

Հայաստանի պաշտպանության նախարարը ևս կարող է մի բան ավելացնել՝ հաշվի առնելով այն, որ դեռևս 2024 թվականի հունիսին էր ռազմական գերատեսչությունը Երևանում Ֆրանսիայի դեսպանատան միջոցով դիմել Էմանուել Մակրոնի կառավարությանը։ Հայ զինվորականները խնդրել էին ֆրանսիացիներին ուղարկել սահմանափակ զորախումբ, որը կտեղակայվի հանրապետությունում։ Հայտնի է, որ Ֆրանսիան, շնորհիվ հայկական հսկայական սփյուռքի, բարեհաճ է այդ հանրապետության նկատմամբ: Այն ժամանակ Փաշինյանը նշել էր, որ Հայաստանը պատրաստ է լինել ԵՄ-ին այնքան մոտ, որքան դա թույլ են տալիս եվրոպացիները, և նշել էր վիզաների ազատականացման գործընթացի մեկնարկի մասին: Դրանից հետո մի խումբ արևմտամետ հայ քաղաքական գործիչներ և հասարակական ակտիվիստներ նախաձեռնեցին ստորագրահավաք ԵՄ-ին անդամակցության մասին օրինագիծը խորհրդարանի քննարկմանը ներկայացնելու համար։ Ընդամենը մի քանի օրում նրանց հաջողվեց ավելի շատ ստորագրություն հավաքել, քան անհրաժեշտ էր ընթացակարգի համար։

Այնուամենայնիվ, որոշ քաղաքական գործիչներ համոզված են, որ Հայաստանին ԵՄ չեն ընդունի, և Արևմուտքի համար հանրապետությունը պետք է դառնա յուրատեսակ Ուկրաինա Կովկասում և հակադրվի Ռուսաստանին ու Իրանին։

«Մայր Հայաստան» շարժումը ղեկավարող քաղաքագետ Անդրանիկ Թևանյանը չի կասկածում, որ Նիկոլ Փաշինյանը հիանալի հասկանում է, որ Հայաստանը չի կարող անդամակցել ԵՄ-ին, և վարչապետի բոլոր խաղերն այդ հարցի շուրջ մանիպուլ յացիա են սեփական վարկանիշը պահպանելու նպատակով։ «Փաշինյանը մանիպուլ յացիա է անում, խաբում է բնակչության այն շերտերին, ովքեր պատրանքներ են կրում Եվրամիությունում ապագա կյանքի մասին», - Թևանյանի խոսքն է մեջբերել News.ru-ն: Եվրոպացիները սակարկության մանրադրամի են վերածել Ուկրաինան Ռուսաստանի դեմ պայքարում, և հիմա ակնկալում են նույնն անել Հայաստանի հետ, պարզաբանել է շարժման առաջնորդը: «Հարևան Վրաստանի իշխանությունը շատ արագ հասկացավ, թե իրականում ինչ է ուզում Արևմուտքն իրենից, ու փրկեցին երկիրը: Իսկ Փաշինյանը, կատարելով իր արևմտյան կուրատորների պատվերը, ուզում է միայն իրեն փրկել»,- ցավով նշել է Թևանյանը։

Նման կարծիքին է նաև քաղաքագետ Գևորգ Միրզայանը։ Նա եվրոինտեգրման օրինագիծն անվանել է Հայաստանի վարչապետի՝ «երկիրը ռուսական ինտեգրացիոն տարածքից դուրս բերելու» քաղաքականության տարրերից մեկը։ Բայց Միրզայանը նաև կարծում է, որ Հայաստանը կարող է ընդհանրապես չապրել մինչև այդ ինտեգրումը։

Ռուս քաղաքագետ Ալեքսեյ Նաումովն էլ կարծում է, որ Նիկոլ Փաշինյանը ԵՄ-ին անդամակցելու գաղափարն օգտագործում է որպես քաղաքական զենք։ Ինչ վերաբերում է ԵՄ-ին, ապա նա դա տեսնում է որպես օգուտ, որը կստանա առանց հսկայական գումարներ ներդնելու։ Նա դիտորդներ կուղարկի, որոշակի գումար և զենք կփոխանցի, բայց դրա դիմաց կստանա մի հանրապետություն, որը պատրաստ կլինի ամեն ինչի: Բայց ամենագլխավորն այն է, որ այդ հանրապետությունը պատրաստ կլինի խաթարել Ռուսաստանի և Ադրբեջանի ծրագրերն ու շահերը, պարզաբանել է Նաումովը։ «Այդ օրինագիծը Փաշինյանին պետք է իշխանության մնալու համար, դա ամենևին էլ ասոցիացիային միանալու իրական փորձ չէ»-, կարծիք է հայտնել ռուս քաղաքագետը։

Այս ամենը, ըստ էության, կարող է ընկալվել որպես խարդախություն Փաշինյանի կողմից, քանի որ դա կբարձրացնի նրա վարկանիշը, իսկ ժողովուրդը պատրանք կստանա, թե Հայաստանը շարժվում է դեպի Եվրոպա։ Մի խոսքով, ամեն ինչ նույնն է, ինչ Ուկրաինայում: Բայց Հայաստանում էլ կան վարչապետի այդ մանիպուլ յացիաների եռանդուն կողմնակիցներ։ Այսպես, Երևանի Կովկասի ինստիտուտի տնօրեն Ալեքսանդր Իսկանդարյանը վերջին տարիներին պատմում է ԵՄ գրավչության մասին ոչ միայն Հայաստանի, այլ նաև հետխորհրդային տարածքի հանրապետությունների համար։ «Եվ մեծ ընտրություն էլ չկա, կա միայն մեկ ԵՄ, ուստի նրա գրավչությունը պահպանվում է «համախմբման այլ փուլում գտնվող երկրների համար»»,- 4 տարի առաջ Ukraina.ru-ին տված հարցազրույցում ասել էր Իսկանդարյանը։ Իսկ ճգնաժամը, որով անցնում է Եվրոպան, հայ քաղաքագետն անվանել էր զարգացման ձևերից մեկը։

Մանրամասները՝ «Փաստ» օրաթերթի այսօրվա համարում