Ծանոթ ու միաժամանակ անհայտ … պեյնտբոլ
ՖՈՏՈ
Paintball-ը էքստրեմալ սպորտի հանրաճանաչ խաղ է, որը հավասարապես վայելում են և՛ տղամարդիկ, և՛ կանայք: Զինված խաղացողները բաժանվում են երկու թիմերի և մտնում են «ռազմի դաշտ», այդ մինի պատերազմում հաղթում է ավելի արագը, ճարպիկը և նշանառուն:
Պեյնտբոլի պատմության մեջ կա այդ էքստրեմալ սպորտի ծագման մի քանի վարկած։
Դրանցից ամենավաղը թվագրվում է տասնիններորդ դարի վերջով։ Հենց այդ ժամանակ է տեղի ունեցել այն «հրազենի» ծնունդը, որը ներկով լիցքեր է արձակում։ Նման զենքի օգնությամբ մարզվել են ֆրանսիական բանակի զինվորները։ Կա նաև ենթադրություն, որ 1937 թվականին Գերմանիան որոշել է օգտագործել ֆրանսիական այդ գաղափարը։ Գերմանացիները սկսել են ներկեր կրակող զենքերի արտադրություն՝ «ներկ արձակող սարքեր», որոնք նրանք անվանել են «սաքսոնական հրացաններ»:
Հյուսիսային Ամերիկայում Պեյնտբոլի ծագման սեփական վարկածն է լայն տարածում գտել։ 30-ականներին մի խումբ կովբոյներ որոշել են զվարճանալ այն ներկ կրակող սարքերով, որոնցով նրանք նշում էին կովերին և ձիերին։ Այդ զվարճանքն ինչ-որ չափով հիշեցնում էր «պատերազմական խաղ»։
Ըստ պենտբոլի ծագման հաջորդ տարբերակի կանադացի անտառահատներն են նման սարքեր օգտագործել ծառերը նշելու համար։
Պենտբոլի առաջին մարկերը ստեղծվել է Crossman ընկերության կողմից անցյալ դարի 60-ականների վերջին։ Բայց դա անհաջող տարբերակ է եղել, պահանջարկը քիչ է եղել և այն բարելավվել է 1972 թվականին: 1981 թվականի հունիսին ԱՄՆ-ում է տեղի ունեցել պայնտբոլի առաջին խաղը։ Այդ փոքր պատերազմը հրացաններով, որոնք ներկ են արձակում, կազմակերպել են երեք ընկերներ՝ բորսայում հոգնեցուցիչ աշխատանքից ընդմիջելու համար: Նրանց մի քանի ընկերներ նույնպես մասնակցել են զվարճալի մարտին: Հանդիսատեսներին և մասնակիցներին դուր է եկել խաղը, և այն արագորեն տարածվել է ոչ միայն Ամերիկայում, այլ նաև նրա սահմաններից դուրս։ Միակ թերությունն այն է եղել, որ գնդիկները յուղոտ էին, իսկ ներկը դժվարությամբ էր հանվում հագուստից։ Թերևս դա է պատճառը, որ հետագայում խաղի նկատմամբ հետաքրքրությունը մարել է։ Այնուամենայնիվ, 1984-85 թվականներին տեղի է ունեցել զարգացման կարևոր փուլը, հայտնագործվել են ժելատինե գնդիկները, որոնք լցված էին ջրում լուծվող ներկով, ինչը հանգեցրել է այդ խաղի ժողովրդականության աճին։
Հենց սկզբում այդ խաղի հրացաններն օդաճնշումային էին։ Կրակոցն արձակվում էր բալոնում սեղմված օդի միջոցով, որը բավարարել էր ընդամենը 10 կրակոցի համար։ Կարճ ժամանակ անց մշակվել է նոր, ավելի կատարելագործված կառուցվածք, որը հնարավորություն է տվել եռապատկել կրակոցների քանակը։ 1985 թվականին հայտնագործվել է ժամանակակից տիպի հրացանը։ Փոփոխություններ են կատարվել պահունակում, հաշվարկվել է գնդակի արձակման օպտիմալ արագությունը, ինչը նվազեցրել է մասնակիցներին վնասելու վտանգը։ 90-ականների կեսերին պենտբոլի կորտերը սկսել են համալրվել փչովի կառույցներով, ինչն էլ ավելի հետաքրքիր է դարձրել խաղը։
Զենքերը ևս շարունակել են զարգանալ: Հայտնվում են կիսաավտոմատ և շուտով լիովին ավտոմատ մարկերային հրացաններ։ Ներկայումս այդ խաղի բազմաթիվ մասնավոր ակումբներ են հայտնվել։
Paintball-ը բաժանվել է երկու առանձին հատվածների՝ սպորտային՝ սպորտային կոմիտեի հսկողության ներքո, և հանգստի կազմակերպված բազմաթիվ մասնավոր ակումբների կողմից:
Այնուամենայնիվ պենտբոլը որպես սպորտային դիսցիպլինա այնքան էլ զարգացած չէ, չնայած պարբերաբար անցկացվում են տարբեր մակարդակների մրցումներ։
Երրորդ, բայց շատ կարևոր ոլորտը պեյնտբոլի օգտագործումն է իրավապահ մարմիններում մարզելու համար:
Կ. Խաչիկյան
