ԱՄՆ-ը թուլացրել է Սիրիայի դեմ պատժամիջոցները
ՄԻՋԱԶԳԱՅԻՆ
Վաշինգտոնը թուլացրել է Սիրիայի դեմ պատժամիջոցները: ԱՄՆ ֆինանսների նախարարության տվյալով՝ դրանք վերաբերում են էներգետիկ, ջրային ռեսուրսներին, գումարային փոխանցումներին և միտված են հեշտացնելու Սիրիայի վերակառուցումը՝ Բաշար Ասադի կառավարումից հետո:
«Խոսքը 2024 թվականի դեկտեմբերի 8-ից հետո Սիրիայի կառավարական կառույցների հետ գործարքների մասին է, որոնք ներառում են նավթի, նավթամթերքի, բնական գազի և էլեկտրաէներգիայի վաճառքի, մատակարարման, պահպանման կամ անհատույց փոխանցման ոլորտում աջակցություն»,- հայտնել է ամերիկյան կողմը:
Ֆինանսների նախարարությունից մանրամասնել են, որ պատժամիջոցների թուլացումը չի տարածվում զինվորական կամ հետախուզական կազմակերպությունների մասնակցությամբ գործարքների վրա, չի ենթադրում սիրիական ծագման նավթի կամ նավթամթերքի ներմուծում Միացյալ Նահանգներ: Վաշինգտոնը բացառում է նաև հնարավոր գործարքներին Ռուսաստանի և Իրանի մասնակցությունը:
Բացի դրանից՝ 6 ամսով տրամադրված ամերիկյան լիցենզիան ոչ կառավարական կազմակերպություններին թույլ է տալիս ներգրավվել Սիրիայում «իրավունքի գերակայության» հետ կապված գործընթացներին:
