Պուտինը ներողություն է խնդրել Ալիևից ինքնաթիռի կործանման համար․ մանրամասներ
ՄԻՋԱԶԳԱՅԻՆ
Ռուսաստանի նախագահ Վլադիմիր Պուտինը և Ադրբեջանի նախագահ Իլհամ Ալիևը հեռախոսով քննարկել են դեկտեմբերի 25-ին Ղազախստանի Ակտաու քաղաքի մերձակայքում Ադրբեջանի ավիաուղիների մարդատար ինքնաթիռի կործանման հարցը, հայտնել է Կրեմլը։
Զրույցը տեղի է ունեցել ռուսական կողմի նախաձեռնությամբ։
Պուտինը ներողություն է խնդրել Ալիևից, որ ադրբեջանական ինքնաթիռի հետ կապված միջադեպը տեղի է ունեցել Ռուսաստանի օդային տարածքում, հայտնել են Կրեմլից։
Զրույցի ընթացքում նշվել է, որ ադրբեջանական մարդատար օդանավը, որը թռիչքներ է իրականացրել խստորեն համաձայն չվացուցակի, բազմիցս փորձել է վայրէջք կատարել Գրոզնիի օդանավակայանում։ Այդ պահին Գրոզնին, Մոզդոկը և Վլադիկավկազը հարձակման են ենթարկվել ուկրաինական մարտական անօդաչու թռչող սարքերի կողմից, իսկ ռուսական հակաօդային պաշտպանության համակարգերը հետ են մղել այդ հարձակումները։
Ռուսաստանի Քննչական կոմիտեն քրեական գործ է հարուցել երթևեկության անվտանգության և օդային տրանսպորտի շահագործման կանոնների խախտման հոդվածով: Կատարվում են նախնական քննչական գործողություններ, հարցաքննվում են քաղաքացիական և ռազմական մասնագետներ։
Ադրբեջանի գլխավոր դատախազության երկու աշխատակիցներ Գրոզնիում են, որտեղ աշխատում են Ռուսաստանի Դաշնության գլխավոր դատախազության և Քննչական կոմիտեի ներկայացուցիչների հետ։
Ռուսաստանի, Ադրբեջանի և Ղազախստանի համապատասխան ծառայությունները սերտորեն համագործակցում են Ակտաու քաղաքի մոտակայքում տեղի ունեցած աղետի վայրում։
