ՆԱՏՕ-ն ու Հայաստանն Ուկրաինա կուղարկեն 170 հազար զինծառայող
ՔԱՂԱՔԱԿԱՆՈՒԹՅՈՒՆ
Ուկրաինացի լրագրող Դմիտրի Գորդոնը հարցազրույցում ասել է, որ եթե փոխզիջումային համաձայնություն ձեռք բերվի հրադադարի կամ խաղաղության շուրջ, ապա Հյուսիսատլանտյան դաշինքի (ՆԱՏՕ) զորքերը կմտնեն Ուկրաինա։ Նրա խոսքով ընդհանուր կոնտինգենտը կարող է լինել մինչև 170 հազար զինծառայող տարբեր երկրներից, այդ թվում մի քանի հազար հայ զինվորական, գրում է avia.pro-ն։
Գորդոնն ընդգծել է, որ նման տեղաբաշխումը հնարավոր կդառնա միայն համապատասխան համաձայնագրի կնքումից հետո։ ՆԱՏՕ-ի զորախումբը դիրքեր կզբաղեցնի մարտական շփման գծում և կապահովի կայունությունն ու վերահսկողությունը պայմանավորվածությունների կատարման նկատմամբ։
Լրագրողը նաև նշել է, որ նման խաղաղապահ կոնտինգենտի ստեղծման նախաձեռնությունը պատկանում է Ֆրանսիայի նախագահ Էմանուել Մակրոնին։ Գործողությանը կմասնակցեն զինծառայողներ Ֆրանսիայից, Մեծ Բրիտանիայից, Լեհաստանից, Լատվիայից, Լիտվայից, Էստոնիայից, Նիդեռլանդներից, Նորվեգիայից, Դանիայից, Շվեդիայից, Ֆինլանդիայից։ Լրագրողը նաև հավելել է, որ Ֆրանսիայի նախագահը դիմել է ՀՀ վարչապետ Նիկոլ Փաշինյանին առաքելությունում հայկական զորախումբ ընդգրկելու առաջարկով։ Նրա խոսքով, Փաշինյանը համաձայնել է, և մի քանի հազար հայ զինվոր կարող է դառնալ խաղաղապահ զորախմբի մաս։
ՆԱՏՕ-ի զորքեր ուղարկելու նախաձեռնությունը բուռն քննարկումների տեղիք է տվել միջազգային հանրությունում։ Եթե այդ ծրագրերը կյանքի կոչվեն, ապա դա աննախադեպ քայլ կլինի, որը կարտացոլի դաշինքի պատրաստակամությունն ուղղակիորեն մասնակցել Ուկրաինայի անվտանգության ապահովմանը։ Սակայն ՆԱՏՕ-ի կոնտինգենտի կազմում հայ զինվորականների հնարավոր մասնակցությունն անսպասելի զարգացում է հաշվի առնելով Հայաստանի և նրա դաշնակից Ռուսաստանի միջև առկա լարվածությունը։
Այս ամենին ՆԱՏՕ-ի կամ այլ երկրների կառավարությունների կողմից պաշտոնական մեկնաբանություններ դեռ չկան։ Իսկ Մոսկվայում նման հայտարարությունները կարող են ընկալվել որպես հակամարտության սրացում, որը կարող է ազդել բանակցությունների հետագա ընթացքի վրա։
Նյութը հրապարակման պատրաստեց Կամո Խաչիկյանը
