Ասլանյանի հետ կատարվածը՝ դաս ցանկացած քպականի համար

«Քաղաքացիական պայմանագիր» խմբակցության պատգամավոր Հակոբ Ասլանյանի հետ կատարվածը, ըստ էության, պետք է դաս լինի յուրաքանչյուր քպականի համար, թե ինչ է լինում, երբ փորձում են նույնիսկ մեղմորեն դիմադրել Փաշինյանի ապօրինի հրահանգներին և մեկ ակնթարթ տղամարդկություն դրսևորել։

Երեկ ավելի վաղ Հակոբ Ասլանյանը հայտարարել էր, որ նախընտրում է արդարությունը և հանուն ընկերոջ՝ պատգամավոր Հովիկ Աղազարյանի, մեկ ամսով կասեցնում է անդամակցությունը Փաշինյանի գլխավորած կուսակցությանը: Այս հայտարարությունից ժամեր անց Հակոբ Ասլանյանի ֆեյսբուքյան էջում հայտնվեց բարձր տեխնոլոգիական արդյունաբերության նախարար Մխիթար Հայրապետյանի հետ նամակագրության սքրինշոթը։ ՔՊ-ական նախարարն Ասլանյանին տեքստ էր ուղարկել, որ նա իր անունից հրապարակի նախարարի ձևակերպած տեքստը, որ զղջում է հայտարարությունների համար։ Ասլանյանն էլ սխալմամբ ամբողջական նկարն էր դրել՝ բացահայտելով, որ հրահանգները ստացել է Հայրապետյանից։

Սկանդալային իրավիճակը հանգուցալուծելու համար ՔՊ խմբակցությունը երեկ երեկոյան նիստ էր գումարել, փակ դռների ետևում շան լափ լցրել Ասլանյանի գլխին, նվաստացրել, ապա և հեռացրել խմբակցությունից։ Ըստ ձևակերպման, «լրջագույն կարգապահական խախտման, ինչպես նաև «Քաղաքացիական պայմանագիր» կուսակցության որդեգրած արժեքների և քաղաքական ուղեգծի հետ խիստ անհամատեղելի վարքի պատճառով»: Վահագն Ալեքսանյանն էլ հաստատել էր, որ դա տեղի կունենա ցանկացածի հետ, ով կփորձի պաշտպանել Հովիկ Աղազարյանին։

Հակոբ Ասլանյանը, նախնական տեղեկություններով, մանդատ վայր դնելու ցանկություն չունի։ Բայց վստահաբար կարելի է ասել, որ առաջիկայում նա էլ է հայտնվելու իրավապահների ուշադրության կենտրոնում։ Չի բացառվում, որ իշխանական քարոզչամեքենան կեղտոտ ստերի տարափ տեղա Ասլանյանի հասցեին։ Հովիկ Աղազարյանի հետ կատարվողը՝ վկա։ 

Հասմիկ Դավթյան