Միգրանտներին են մեղադրել ռուբլու անկման համար. «Դուրս են հանում միլիարդներ»
ՔԱՂԱՔԱԿԱՆՈՒԹՅՈՒՆ
ՌԴ Պետդումայի Կոմունիստական կուսակցությունից պատգամավոր Միխայիլ Մատվեևը միգրանտների մեջ է տեսնում դոլարի աճի և ռուբլու անկման ևս մեկ պատճառ, գրում է iarex.ru-ն։ «Ռուսաստանում միլիոնավոր միգրանտներ հանում են իրենց եկամուտները մեր տնտեսությունից ուղարկելով իրենց հայրենիք։ Արդեն մի քանի տարի է այդ տրանսֆերտների ամբողջական վիճակագրությունը փակ է, բայց ըստ արտահոսքերի դրանք հսկայական գումարներ են»,- նշել է Մատվեևը։
Տվյալները տարբեր են, բայց, ըստ երևույթին, Տաջիկստանի ՀՆԱ-ի կեսը կազմում են Ռուսաստանից ստացվող տրանսֆերտները (2023 թվականին 5,7 մլրդ դոլար), Ղրղզստանի դեպքում դա մեկ երրորդն է, Ուզբեկստանի դեպքում 12-15 %-ը, կամ ավելի քան 14,5 մլրդ դոլար, շարունակել է նա։ «Եվ կան նաև Վրաստանի ավելի քան 2 միլիարդ դոլար տրանսֆերտները, Հայաստանի ավելի քան 3 միլիարդ դոլարը, Ղազախստանը և այլն,- շարունակել է պատգամավորը,- այսինքն միգրանտները և նրանց սփյուռքը Ռուսաստանում ամեն տարի տասնյակ միլիարդավոր դոլարներ են գնում մեր բանկերից՝ արհեստականորեն խթանելով արտարժույթի պահանջարկը և փոխարժեքի աճը»։
Սրան հավելենք, որ ԱՊՀ, այսպես կոչված, «բարեկամ» գրեթե բոլոր երկրները պատժամիջոցներ են կիրառել ռուսական բանկերի և MIR քարտերի դեմ, այսինքն՝ Ռուսաստանից այդ երկրներ ռուբլու փոխանցումները դժվար են, ուստի միգրանտները կանխիկ արժույթ են գնում և այն հանում երկրից, ընդգծել է Մատվեևը։
«Բացի գազի և նավթի արտահանումից դոլարի աճի հաշվին ռուսական բյուջեի կարողությունները մեծացնելու ցանկությունից, դա հանգեցնում է փոխարժեքի արհեստական բարձրացմանը, միլիոնավոր միգրանտներ գնում են միլիարդավոր դոլարներ»,- եզրափակել է նա։
Պետդումայի պատգամավոր Նինա Օստանինան էլ (ՌԴ Կոմունիստական կուսակցություն) նշել է, որ Կենտրոնական բանկը հաջորդ տարվա համար կարող է հիմնական տոկոսադրույքը հասցնել 23 %-ի արդեն դեկտեմբերին։ «Այսպիսով, երկրի ֆինանսական իշխանությունները շարունակում են «բուժել» համակարգային հիվանդությունը միաժամանակ սրելով այն։ Այդ ամենը կարող է ավարտվել աղետով, ինչպես սիրիական Հալեպում, միայն թե տնտեսապես»,- ամփոփել է Օստանինան: Իսկ Տնտեսական զարգացման նախարարության ղեկավար Մաքսիմ Ռեշետնիկովը ռուբլու անկման հիմնական մեղավոր է համարում խուճապը։
Նյութը հրապարակման պատրաստեց Կամո Խաչիկյանը
