Փաշինյանը արևմտյան սադրանք է. ո՞վ կարող է ապահովել Հայաստանի անվտանգությունը. «Փաստ»

«Փաստ» օրաթերթը գրում է.

news.ruն «Հայաստանը՝ վե՞րջ, Ռուսաստանը չի՞ օգնի. ի՞նչ է ասել Փաշինյանը ՀԱՊԿի հետ հարաբերությունների «խզման» մասին» վերնագրով հոդվածում գրում է, որ Երևանն իրեն համարում է ՀԱՊԿից դուրս և մտադիր չէ վերադառնալ կազմակերպություն, ասել է Նիկոլ Փաշինյանը։ Ինչո՞ւ է նա հերթական անգամ դեմ արտահայտվում ՀԱՊԿին, արդյո՞ք Ռուսաստանը կօգնի Հայաստանին, ի՞նչ են ասում ստեղծված իրավիճակի մասին Պետդումայում ու Դաշնության խորհրդում: Ըստ Նիկոլ Փաշինյանի, Երևանի և ՀԱՊԿի հարաբերություններն անցել են «անդառնալիության կետը»։ Այդ հայտարարությունն արվել է հանրապետության խորհրդարանում կառավարության հետ հարցուպատասխանի ժամին։ Ներկայում, ըստ Փաշինյանի, Հայաստանն իրեն համարում է ՀԱՊԿից դուրս և չի մասնակցում Հավաքական անվտանգության պայմանագրի կազմակերպության աշխատանքներին։ «Մենք ուղղակի վետո չենք դնում ոչ մի փաստաթղթի վրա, քանի որ, ըստ էության, մեզ համարում ենք ՀԱՊԿից դուրս, թող անեն՝ ինչ ուզում են։

Այս իրավիճակը գնալով դժվարացնում է Հայաստանի վերադարձը ՀԱՊԿ, եթե չասենք՝ անհնարին է դարձնում։ Կարծում եմ, որ այստեղ մենք անցել ենք անշրջելիության կետը», ասել է Հայաստանի կառավարության ղեկավարը։ Միևնույն ժամանակ, news.ruի դիվանագիտական աղբյուրը նշել է, որ ՀԱՊԿը Հայաստանի դուրս գալու վերաբերյալ փաստաթղթեր չի ստացել, և այս պահին «ոչ ոք չի հասկանում», թե ի՞նչ «անդառնալիության կետի» մասին է խոսում Փաշինյանը: Բացի դա, ՀԱՊԿ գլխավոր քարտուղար Իմանգալի Թասմագամբետովը դեկտեմբերի 4ին մամուլի ասուլիսի ժամանակ հայտարարել էր, որ Հայաստանի չմասնակցությունը չի ազդում ՀԱՊԿ արդյունավետության վրա։ Միևնույն ժամանակ, կազմակերպության անդամները «ենթադրում են, որ Հայաստանի Հանրապետությունն իրենց դաշնակիցն է, և Հայաստանի նկատմամբ իրենց բոլոր պարտավորությունները մնում են»։

Պետդումայի պատգամավոր Վիկտոր Վոդոլացկին news.ruի հետ զրույցում նշել է, որ Փաշինյանը Ռուսաստանի հետ հարաբերություններում արդեն վաղուց է անցել «անդառնալիության կետը», Հայաստանի կառավարության ղեկավարը սկզբում ընդգծված անտեսել էր ՀԱՊԿ նիստը և ՀԱՊԿ խորհրդարանական վեհաժողովը, ապա մի շարք հարձակումներ կատարել Ռուսաստանի դեմ։ «Բայց ամենակարևոր անդառնալիության կետը Ֆրանսիայում էր, որտեղ Փաշինյանը երդվեց հավատարմորեն ծառայել Արևմուտքին։ Այսօր Փաշինյանը պատանդ է դարձրել ողջ հայ ժողովրդին և Հայաստանի Հանրապետությունը: Արևմուտքն այսօր փորձում է իրեն ենթարկել Վրաստանը, ինչպես դա արեց Ուկրաինայի հետ։ Նրանց թիրախը նաև Հայաստանն ու հայ ժողովուրդն են, և Փաշինյանը դարձել է արևմտյան շահերի լոբբիստ», հայտարարել է Վոդոլացկին։ Պատգամավորի խոսքով, Հայաստանում ստեղծելով արևմտյան ազդեցության բազաներ ու կենտրոններ՝ կստեղծվի Իրանի հետ առճակատման մարտադաշտ։

«Շատ ցավալի ու վատ է, որ դա տեղի է ունենում, բայց դրա մեղավորը հենց իրենք՝ հայաստանցիներն են, ովքեր արդեն մի քանի անգամ «այրվածք» են ստացել, բայց ոչ մի քայլ չեն ձեռնարկել, որպեսզի կանխեն այն իրավիճակը, որը կստեղծվի այնտեղ մոտ ապագայում։ Կարծում եմ, որ հիմա կավելանա այն մարդկանց հոսքը, ովքեր կսկսեն լքել Հայաստանը և փախչել Ռուսաստանում ապրող իրենց հարազատների մոտ», նշել է Վոդոլացկին։ Պատգամավորն ընդգծել է, որ, չնայած Հայաստանի իշխանությունների գործողություններին, Ռուսաստանը երես չի թեքելու հայ ժողովրդից: «Մեզ համար հայը դատարկ արտահայտություն չէ: Մենք շատ ընդհանրություններ ունենք։ Հայաստանը Փաշինյանով չի ավարտվում: Փաշինյանը արևմտյան սադրանք է, ոչ ավելին, և Հայաստանի քաղաքացիների մեծամասնությունը պարզապես պետք է տեղեկացված լինի, որ Ռուսաստանը եղել է բարեկամ երկիր և մնում է այդպիսին, և մենք չենք պատրաստվում դավաճանել մեր հարաբերություններին»,- ընդգծել է Վոդոլացկին։

Դաշնային խորհրդի անդամ, միջազգային կոմիտեի ղեկավարի առաջին տեղակալ Վլադիմիր Ջաբարովն էլ news.ruի հետ զրույցում ընդգծել է, որ, բացի ՀԱՊԿից, ոչ ոք չի կարող ապահովել Հայաստանի անվտանգությունը։ «Ես ուղղակի չեմ տեսնում, թե ո՞վ կարող է փոխարինել, ո՞վ կարող է ապահովել Հայաստանի անվտանգությունը արտաքին սպառնալիքի դեպքում, բացի ՀԱՊԿից։ Ո՞վ կփոխարինի Ռուսաստանին կամ ՀԱՊԿ մյուս երկրներին: Ամերիկացինե՞րը: Բայց մենք տեսնում ենք, թե ինչպես են նրանք «փոխարինել մեզ» Ուկրաինայում։ Գուցե ֆրանսիացինե՞րը, որոնք իրենք են փախչում Աֆրիկայից: Անկեղծ ասած, կարծում եմ, որ այս ամենն, ի վերջո, կանցնի։ Եվ ես հույս ունեմ, որ մեր հարաբերություններում ողջախոհությունը կգերակայի։ Ռուսաստանը եղել է, կա և կմնա Հայաստանի ժողովրդի միակ իսկական բարեկամը տեսանելի ապագայում», -հայտարարել է սենատորը։

Մանրամասները՝ «Փաստ» օրաթերթի այսօրվա համարում