Գիտությունը միավորել է Սանկտ-Պետերբուրգին և Հայաստանին
ՄՇԱԿՈՒՅԹ
ՌԴ ԳԱ Սանկտ Պետերբուրգի մասնաճյուղի պատվիրակությունն այցելել է ՀՀ ԳԱԱ, գրում է Scientificrussia.ru-ն։ Այդ այցը երկարամյա համագործակցության շարունակությունն ու համախմբումն է, որը երկար տարիների պատմություն ունի։ Մասնավորապես, Նևայի վրա գտնվող քաղաքի գիտնականները նպաստել են Հայաստանի գիտությունների ակադեմիայի ձևավորմանը։ Միաժամանակ հայ ուսանողները սովորել են Լենինգրադի և Սանկտ Պետերբուրգի համալսարաններում: Հայ գիտնականները զգալի ներդրում են ունեցել հայրենական գիտության զարգացման գործում։ Բավական է նշել այնպիսի անուններ, ինչպիսիք են ԽՍՀՄ ԳԱ ակադեմիկոս Ժոզեֆ Օրբելին՝ Պետական Էրմիտաժի տնօրենը (1934-1951) և ՀԽՍՀ ԳԱ առաջին նախագահը (1943-1947 թթ.), ականավոր աստղագետ Վիկտոր Համբարձումյանը՝ ՀԽՍՀ ԳԱ նախագահ (1947-1993 թթ.), Արմեն Թախտաջյանը՝ ԽՍՀՄ ԳԱ բուսաբանական ինստիտուտի տնօրեն (1976-1986 թթ.), Արտյոմ Միկոյանը, ում ղեկավարությամբ մշակվել են ՄիԳ շարքի ինքնաթիռները...
Այցի ընթացքում ստորագրվել է հնգամյա պայմանագիր և ճանապարհային քարտեզ հինգ ոլորտներում, որոնք են կենսագիտություն (բժշկություն, կենսատեխնոլոգիա), ագրոկենսատեխնոլոգիա և գյուղատնտեսություն, բնական, մաթեմատիկական և ֆիզիկական գիտություններ, սոցիալական, հումանիտար և տնտեսական գիտություններ, կիրառական գիտություններ և արդյունաբերական տեխնոլոգիաներ։
«ՌԴ ԳԱ Սանկտ Պետերբուրգի մասնաճյուղի և Հայաստանի ԳԱԱ-ի միջև համագործակցությունը կարևոր քայլ է մեր երկրների միջև հարաբերությունների ամրապնդման ուղղությամբ: Համատեղ ծրագրերն ու հետազոտությունները, որոնք մենք կիրականացնենք, ոչ միայն կնպաստեն մեր ակադեմիաների զարգացմանը, այլ նաև նշանակալից ներդրում կդառնան համաշխարհային գիտության մեջ: Բացի դա հատուկ ուշադրություն է դարձվելու գիտնականների մատաղ սերնդին աջակցելուն»,- ընդգծել է Ռուսաստանի գիտությունների ակադեմիայի Սանկտ Պետերբուրգի մասնաճյուղի նախագահ, ակադեմիկոս Անդրեյ Ռուդսկոյը։
«Այս հանդիպումը Հայաստանի Հանրապետության և Ռուսաստանի Դաշնության միջև համագործակցության ևս մեկ քայլ է, որը երկար տարիների պատմություն ունի։ Մեր երկրները բաց են միմյանց համար և կառուցողական երկխոսություն են վարում։ Հայաստանը վաղուց է համագործակցում Սանկտ Պետերբուրգի ինստիտուտների հետ տարբեր գիտական ուղղություններով»,- նշել է ՀՀ ԳԱԱ նախագահ Աշոտ Սաղյանը։
Նյութը հրապարակման պատրաստեց Կամո Խաչիկյանը
