Քաղաքագետ. Փաշինյանի հարձակումները երկրի խորհրդանիշների վրա ուղղված են արտաքին լսարանին
ՔԱՂԱՔԱԿԱՆՈՒԹՅՈՒՆ
Վարչապետ Նիկոլ Փաշինյանի գլխավորությամբ Հայաստանի իշխող «Քաղաքացիական պայմանագիր» կուսակցության ներկայացուցիչների հայ ժողովրդի ազգային խորհրդանիշների և հերոսների վրա հարձակումներն ազդակ են արտաքին լսարանի համար, ասել է «Բարգավաճ Հայաստան» խմբակցության նախկին պատգամավոր, քաղաքագետ Վահե Հովհաննիսյանը, գրում է rossaprimavera.ru-ն։
Քաղաքագետը նման կերպ է արձագանքել խորհրդարանում վարչապետ Նիկոլ Փաշինյանի խոսքերին, երբ նա ասել է, որ հայրենասիրական երգերից մեկում երգված «կամավորը» պետականության բացակայության խորհրդանիշ է։
«Եկեք փորձենք դրսից նայել, թե ինչպես են մեզ տեսնում բարեկամական և թշնամական հարևան պետությունները, միջազգային ասպարեզում հիմնական խաղացողները։ Նրանք տեսնում են «ոչնչի մասին» պետություն, որն ապակողմնորոշված է և չի կարողանում գտնել հետպատերազմյան վերակառուցման ճանապարհը»,- նշել է նախկին պատգամավորը։
Փաշինյանի խոսքերը վկայում են այն մասին, որ Հայաստանը ռեսուրսներ չունի սխալներն արձանագրելու, աշխարհում և Անդրկովկասում կատարվողը հասկանալու, պարտությունից հետո վերականգնման ուղին բռնելու համար, նշել է քաղաքագետը։
Հովհաննիսյանը Հայաստան պետությունը համեմատել է «բաց ծովում լողացող տաշեղի հետ»: Բայց ծովում լողալը սովորաբար ավարտվում է աղետով, ընդգծել է նա։
Հովհաննիսյանի խոսքով Փաշինյանի հայտարարությունները կարող էին նորմալ ընկալվել, եթե նա դրանք ներկայացներ որպես հայեցակարգային տեսլական իր կառավարման սկզբում։ Բայց ՀՀ կառավարության ղեկավարն այս խոսքերն ասում է իր գահակալության վեցերորդ տարում, մինչդեռ նախորդ բոլոր տարիներին տրամագծորեն հակառակն է ասել, ինչը մոտալուտ աղետի ազդանշան է, եզրափակել է քաղաքագետը։
Հիշեցնենք, որ 2023 թվականին Նիկոլ Փաշինյանը կոչ էր արել «քաղաքականապես» ուղղել Հայաստանի օրհներգը, քանի որ այն «ավարտվում է մահվան մասին խոսքերով»։
Բացի այդ, Փաշինյանը միաժամանակ քննադատել է Հայաստանի զինանշանն այն բանի համար, որ դրա վրա պատկերված խորհրդանիշները վերաբերում են «պատմական» Հայաստանին և դրանք իբր որևէ կապ չունեն «իրական» Հայաստանի հետ։
Փորձագետները նշում են, որ Թուրքիայի պնդումներից մեկը, որը խոչընդոտում է դիվանագիտական հարաբերությունների վերականգնմանը և Հայաստանի հետ սահմանի բացմանը, կապված է զինանշանի հետ, որտեղ պատկերված է Արարատ լեռը։
Հայկական զինանշանի վրա Թուրքիայի տարածքում գտնվող Արարատի պատկերն Անկարայում համարում են ապացույց, որ Հայաստանը տարածքային պահանջներ ունի Թուրքիայի նկատմամբ։
Նյութը հրապարակման պատրաստեց Կամո Խաչիկյանը
