Ալիևն ու Փաշինյանը կարող են վերադառնալ բանակցությունների մոսկովյան հարթակ
ՔԱՂԱՔԱԿԱՆՈՒԹՅՈՒՆ
Թուրքիայի նախագահ Ռեջեփ Թայիփ Էրդողանը և Հայաստանի վարչապետ Նիկոլ Փաշինյանը զրուցել են Բուդապեշտում Եվրոպական քաղաքական համայնքի 5-րդ գագաթնաժողովի շրջանակում։ Հայաստանի վարչապետի մամուլի ծառայությունը մանրամասներ չի հայտնել։ Նախկինում նման հանդիպում տեղի էր ունեցել Նյու Յորքում՝ Մանհեթենի «Թուրքական տուն» երկնաքերում, որը համարվում է ԱՄՆ-ում թուրքական ներկայության յուրօրինակ խորհրդանիշ։ Այս երկու իրադարձությունները միավորված են ընդհանուր իմաստով, երկու երկրների ղեկավարների միջև երկխոսությունը սկսել է կայուն բնույթ ստանալ, և կողմերը տարբեր պայմաններում և տարբեր ձևաչափերի հարթակներում քննարկում են երկու երկրների միջև դիվանագիտական հարաբերությունների վերականգնման հարցը։ Միևնույն ժամանակ, հայկական կողմը հայտարարել է, որ պատրաստ է Թուրքիայի հետ երկխոսության «առանց նախապայմանների», մինչդեռ Անկարան կարգավորման գործընթացը կապում էր Բաքվի և Երևանի միջև խաղաղության պայմանագրի ստորագրման հետ։ Ի՞նչ կլինի հաջորդիվ, և արդյո՞ք Թուրքիա-Ադրբեջան-Հայաստան եռանկյունու իրադարձությունները մոտենում են ինչ որ հանգուցալուծման: Այդ մասին իր մտքերն է հայտնել Iarex.ru լրատվական գործակալության սյունակագիր Ստանիսլավ Տարասովը։
«Այդ ուղղությամբ երկխոսությունն այժմ ավելի ու ավելի է նմանվում դիվանագիտական մարաթոնյան վազքի, բայց առանց կոնկրետ վերջնագծի: Ճիշտ է, Երևանն ու Բաքուն բազմաթիվ հայտարարություններ են արել մինչև այս տարվա վերջ խաղաղության պայմանագրի ստորագրման հնարավորության մասին։ Բաքվին հաջողվում է կանխել Անկարայի և Երևանի միջև «առանց նախապայմանների» անկախ երկխոսությունը` ամեն ինչ կապելով Երևանի հետ խաղաղության պայմանագրի ստորագրման հետ։ Իր հերթին, Էրդողանը, ելույթ ունենալով Թյուրքական պետությունների կազմակերպության ղեկավարների գագաթնաժողովում, ուշադրություն է հրավիրել այն փաստի վրա, որ «Հարավային Կովկասում խաղաղության և կայունության դարաշրջան է գալիս», և որ «ինքը հույս ունի ամրապնդել բարեկամ Ադրբեջանի պատմական հաջողությունը բանակցությունների սեղանի շուրջ Հայաստանի հետ խաղաղության պայմանագիր ստորագրելով»:
Կազանում BRICS-ի գագաթնաժողովի շրջանակներում տեղի ունեցած անձնական հանդիպումից հետո Ադրբեջանի նախագահ Իլհամ Ալիևը և Փաշինյանը հայտարարեցին, որ կողմերը «շատ մոտ ապագայում» կվերադառնան արտաքին գործերի նախարարների մակարդակով երկխոսությանը։ Բայց, ինչպես հայտարարեց Հայաստանի փոխարտգործնախարար Վահան Կոստանյանը, «պետությունների ղեկավարների կամ արտգործնախարարների հնարավոր հանդիպման մասին պայմանավորվածություններ չկան, բայց մեզ հետաքրքրում է նման հանդիպումների ինտենսիվությունը»։ Այնպես որ չի բացառվում, որ Ալիևն ու Փաշինյանը կարող են վերադառնալ բանակցությունների մոսկովյան հարթակ:»
Նյութը հրապարակման պատրաստեց Կամո Խաչիկյանը
