Պարտադրելով խաղաղություն. Ադրբեջանի Անվտանգության խորհրդի քարտուղարը զգուշացրել է Հայաստանին
ՔԱՂԱՔԱԿԱՆՈՒԹՅՈՒՆ
Ադրբեջանի Անվտանգության խորհրդի քարտուղար Ռամիլ Ուսուբովը հնչեղ հայտարարություն է արել Հայաստանի հետ խաղաղ կարգավորման վերաբերյալ, գրում է dzen.ru-ն։
Ուսուբովը կարծում է, որ որոշ օտարերկրյա պետությունների և կազմակերպությունների փորձերն օգտագործել Հայաստանի տարածքը սպառնալիքների նոր օջախներ ստեղծելու համար, ավելի են սրում առանց այն էլ լարված իրավիճակը Հարավային Կովկասի տարածաշրջանում։ Միաժամանակ, ըստ նրա, վերջին ամիսներին կտրուկ աճել է նման գործունեության ինտենսիվությունը։ Ուստի Ադրբեջանի և Հայաստանի համար կարևոր է ոչ միայն խաղաղության պայմանագիր ստորագրելը, այլ նաև դրա իրական իրականացումն ապահովելը, նշել է Ադրբեջանի Անվտանգության խորհրդի քարտուղարը։
«Ադրբեջանը, որպես հաղթանակած երկիր և տարածաշրջանի ռազմական հզորության կենտրոն, կարող է ստիպել Հայաստանին ստորագրել խաղաղության պայմանագիր»,- զգուշացրել է Ուսուբովը։
Նրա կարծիքով պաշտոնական Բաքուն դա կարող է անել ելնելով միջազգային իրավունքի պահանջներից և միջազգային պրակտիկայի տասնյակ փաստերից։ «Ադրբեջանը, չնայած իր հաղթանակին, բանակցային գործընթացում հեռու է ամբարտավանությունից։ Հայաստանի իշխանությունները որոշումներ կայացնելիս պետք է հաշվի առնեն իրենց պետության ու ժողովրդի շահերը»,- ասել է Ուսուբովը։
Եթե Երևանն ուժ գտնի ազատվելու արտաքին հովանավորների վնասակար ազդեցությունից, ապա հնարավոր կդառնա Բաքվի հետ խաղաղության պայմանագրի ստորագրումը, ընդգծել է Ադրբեջանի Անվտանգության խորհրդի քարտուղարը։
Նյութը հրապարակման պատրաստեց Կամո Խաչիկյանը
