«Ի՞նչ, Որտե՞ղ, Ե՞րբ» գիտակների միջազգային կազմակերպությունը Ռուսաստանում անցանկալի է ճանաչվել
ՄԻՋԱԶԳԱՅԻՆ
Ռուսաստանում անցանկալի է ճանաչվում Internationale Assoziation für Intellektuelle Spiele (Ինտելեկտուալ խաղերի միջազգային ասոցիացիա, IAIS, Լիխտենշտեյն) միջազգային ոչ կառավարական կազմակերպության գործունեությունը: Նման որոշում է կայացրել Ռուսաստանի Դաշնության գլխավոր դատախազությունը, ասվում է գերատեսչության հաղորդագրության մեջ, գրում է eadaily.com-ը։ Կազմակերպությունը միավորում է «Ի՞նչ, Որտե՞ղ, Ե՞րբ», «Բրեյն ռինգ», «Սեփական խաղ» և հարակից այլ խաղերի ավելի քան 200 մասնակիցների Եվրոպայից, Ասիայից և Հյուսիսային Ամերիկայից:
«Չնայած կանոնադրության դրույթներին, որոնք արգելում են մասնակցել քաղաքական գործունեությանը, IAIS-ն իրականում առցանց տեղեկատվություն է տարածում, որն ուղղված է վարկաբեկելու Ռուսաստանի Դաշնության ղեկավարությանը և երկրի արտաքին և ներքին քաղաքականությանը: Այդ կազմակերպությունը ներգրավված է արտասահմանյան հակառուսական կենտրոնների նախաձեռնած քարոզչական արշավներում, որոնք ուղղված են Ռուսաստանում բողոքի և ապակայունացման գաղափարների առաջմղմանը», - նշել է Գլխավոր դատախազությունը։
Նշվել է նաև, որ Ռուսաստանի և Բելառուսի մասնակիցներին արգելվել է միջազգային մրցաշարերում հանդես գալ իրենց երկրների դրոշների ներքո, IAIS-ը նաև կանոնակարգեր է սահմանել, ըստ որի խաղացողները, ովքեր աջակցում են Ուկրաինայում հատուկ ռազմական գործողությանը, չեն կարող մասնակցել կազմակերպության հովանու ներքո անցկացվող խաղերին: Միևնույն ժամանակ, IAIS-ի միջոցառումներին շարունակում են մասնակցել օտարերկրյա գործակալները, ինչպես նաև Ռուսաստանի տարածքում անցանկալի համարված հասարակական կազմակերպությունների անդամները։
Հիշեցնենք, որ դեռևս 2022 թվականին IAIS-ն հայտարարություն էր տարածել դատապարտելով Հատուկ ռազմական գործողությունը։ Բացի այդ, կազմակերպության միջոցառումներին վաղուց արգելված է հարցեր տալ ռուսական մշակույթի, ինչպես նաև Ռուսաստանի հետ կապված տեղանունների վերաբերյալ:
2022 թվականի մայիսից կազմակերպությունը որոշակի քաղաքականացված գործողություններ է ձեռնարկել մի շարք խաղացողների նկատմամբ։ Այսպիսով, «ագրեսիվ պատերազմին աջակցելու համար» Պետդումայի պատգամավոր Անատոլի Վասերմանը ցմահ հեռացվել է խաղերից, մոբիլիզացվածների առջև ելույթ ունենալու համար մագիստր Մաքսիմ Պոտաշովն է ցմահ հեռացվել խաղերից: Բացի այդ, կազմակերպության անունից հայտարարություն է ընդունվել, որում ամեն կերպ մեղադրում են Ռուսաստանին, իսկ Ուկրաինան սպիտակեցնում։
Հիշեցնենք նաև, որ Ռուսաստանի օտարերկրյա գործակալների ռեգիստրում ընդգրկվել են «Ի՞նչ, Որտե՞ղ, Ե՞րբ» խաղի երկու նախկին մագիստրներ՝ Իլյա Նովիկովը և Ռովշան Ասկերովը։ Ներքին գործերի նախարարությունն առաջին անգամ Նովիկովին հետախուզման մեջ է մտցրել 2022 թվականի դեկտեմբերին ռուսական բանակի մասին կեղծիքների մասին քրեական գործով։ 2023 թվականի հունիսին Մոսկվայի իրավաբանների ասոցիացիան Նովիկովին զրկել է Ռուսաստանում փաստաբանի կարգավիճակից մեղադրելով նրան «անպատշաճ պահվածքի մեջ»։ 2023 թվականի դեկտեմբերին Ռուսաստանի Քննչական կոմիտեն նոր քրեական գործ է հարուցել նրա դեմ ՌԴ զինված ուժերի մասին կեղծիքների համար։ Ավելի ուշ նա ներառվել է ահաբեկիչների և ծայրահեղականների Ռոսֆինմոնիթորինգի ռեգիստրում: Իսկ այս տարվա օգոստոսի սկզբին Նովիկովը հեռակա կարգով ձերբակալվել է պետական դավաճանության քրեական գործով։
Ասկերովը հեռակա ձերբակալվել է 2022 թվականի մայիսին օտարերկրյա գործակալի կարգավիճակ ստանալուց անմիջապես հետո, նացիզմի ռեաբիլիտացիայի գործով՝ Գեորգի Ժուկովի մասին գրառման պատճառով։ Նույն ամսին Ասկերովը հեռացել է Ռուսաստանից։ Ներկայումս նա գտնվում է դաշնային հետախուզման մեջ:
Նյութը հրապարակման պատրաստեց Կամո Խաչիկյանը
