«Իրանը ողջունում է առաջընթացը Հայաստան-Ադրբեջան խաղաղության բանակցություններում»
ՔԱՂԱՔԱԿԱՆՈՒԹՅՈՒՆ
Ստամբուլում կայացել է «3+3» Հարավային Կովկասի տարածաշրջանային համագործակցության պլատֆորմի երրորդ հանդիպումը՝ Ադրբեջանի, Հայաստանի, Իրանի և Ռուսաստանի Դաշնության արտաքին գործերի նախարարների մասնակցությամբ, գրում է իրանական nournews.ir հրատարակությունը։
Հանդիպմանը քննարկվել են Հարավային Կովկասում կայուն խաղաղության և կայունության հաստատման, ինչպես նաև տարածաշրջանային զարգացմանն առնչվող հարցեր։ Մտքերի փոխանակություն է տեղի ունեցել նաև կոնկրետ նախագծերի միջոցով տարածաշրջանային համագործակցության խորացման շուրջ։
Հանդիպումն ավարտվել է Թուրքիայի արտաքին գործերի նախարարության տարածած համատեղ հայտարարությամբ։ Հայտարարությունում նշվում է, որ այդ հարթակի առաջնային նպատակն է ընդլայնել բազմակողմ համագործակցությունը Հարավային Կովկասում հիմնված փոխշահավետության վրա և առաջնորդվելով տարածաշրջանային ինքնակարգավորման սկզբունքով: Համատեղ հռչակագրում ընդգծվել է տարածաշրջանային տնտեսական համագործակցության կարևորությունը երկրների միջև վստահության ամրապնդման, ինչպես նաև բարգավաճման և կայունության գործում: Պայմանավորվածություն է ձեռք բերվել ուսումնասիրել փոխգործակցության հնարավորությունները տրանսպորտի, կապի, առևտրի, էներգետիկայի, ներդրումների և կապի ոլորտներում։ Հռչակագրում նաև ընդգծվել է երկխոսության միջոցով տարածաշրջանում խաղաղության և կայունության հաստատման կարևորությունը:
Իրանի արտգործնախարար Արաղչին իր խոսքում «3+3» տարածաշրջանային համագործակցության մեխանիզմը որակել է որպես տարածաշրջանային երկրների կողմից տարածաշրջանային խնդիրները լուծելու այդ երկրների կամքի խորհրդանիշ։
Ողջունելով հայ-ադրբեջանական խաղաղ բանակցությունները նա ասել է, որ Իրանը հարգում է երկրների տարածքային ամբողջականությունը, ազգային ինքնիշխանությունը և միջազգայնորեն ճանաչված սահմանները, ինչպես նաև խուսափում է ուժի կիրառումից կամ դրա կիրառման սպառնալիքից որպես տարածաշրջանում կայուն խաղաղության հաստատման պահանջ։ Անդրադառնալով Գազայում և Լիբանանում Սիոնիստական ռեժիմի կողմից շարունակվող դաժան հանցագործություններին նա դատապարտել է ԱՄՆ-ի և արևմտյան որոշ երկրների լռությունը դա որակելով որպես կեղծավորության խորհրդանիշ:
Նյութը հրապարակման պատրաստեց Կամո Խաչիկյանը
