Նիկոլ Փաշինյանը նկատել է «անվերադարձելիության կետը»
ՔԱՂԱՔԱԿԱՆՈՒԹՅՈՒՆ
Նիկոլ Փաշինյանը ՀԱՊԿ-ն անվանել է սպառնալիք Հայաստանի անվտանգության համար: Նրա խոսքով երկիրը մոտ է «ՀԱՊԿ-ի հետ հարաբերություններում անվերադարձելիության կետին»։ Միաժամանակ Նիկոլ Փաշինյանը նշել է, որ երկիրը չի խզելու տնտեսական կապերը ո՛չ Ռուսաստանի, ո՛չ ԵԱՏՄ-ի հետ, սակայն նախատեսում է մեծացնել ապրանքաշրջանառությունը Եվրամիության հետ։ Քաղաքական գործչի խոսքով Հայաստանը ԵՄ-ին անդամակցելու հնարավորությունը, եթե դա լինի, բաց չի թողնի, գրում է kommersant.ru-ն:
Այնուամենայնիվ, Երևանը կարող է երկար սպասել դրան, կարծում է ՄԳԻՄՕ-ի միջազգային հետազոտությունների ինստիտուտի առաջատար գիտաշխատող Նիկոլայ Սիլաևը: «Այս վերջին հայտարարությունը հաստատում է, որ Հայաստանի ղեկավարությունը վճռական է Ռուսաստանի հետ խզելու հարցում։ Այդ ընթացքը նոր չէ, բայց Երևանի կողմից հակառուսական հռետորաբանության նոր աստիճանի բարձրացում կարելի է հստակ արձանագրել։ Նախկինում Հայաստանում ասում էին, թե իբր ՀԱՊԿ-ն անպետք է, հիմա ասում են ՀԱՊԿ-ն վնասակար է։ Մեղադրանքները, որոնք հնչել են, շատ կոշտ են: Ռուսաստանի արձագանքը Երևանի հարաբերությունները խզելու քաղաքականությանը նույնպես այսօր կամ երեկ չի ձևավորվել։ Դա այն է, որ Մոսկվան ինքը չի նախաձեռնի խզումը, և այդ դիրքորոշումը չի փոխվի։ Երբ Հայաստանը սկսի գործել, այդ ժամանակ կձեռնարկվեն որոշակի պատասխան քայլեր։ Ինչ վերաբերում է Հայաստանում ԵՄ առաքելությանը, ապա այն կա, բայց, իհարկե, չի լուծում երկրի անվտանգության խնդիրը։ Ռազմական օգնության մասին հայտարարություններն առայժմ մնում են միայն խոստումներ։ Չեմ կարծում, որ այստեղ ինչ-որ բան կփոխվի։ Հայաստանը կարող է երկար սպասել, մինչև ԵՄ-ին անդամակցելու հնարավորությունը հայտնվի»,- ասել է նա։
Հիշեցնենք, որ վերջերս Երևան էր այցելել Ֆրանսիայի արտգործնախարարության ղեկավար Ստեֆան Սեժուրնեն և հայտարարել, որ Փարիզը պատրաստ է հետագայում ևս նպաստել Եվրամիության հետ Հայաստանի մերձեցմանը։ Այնուամենայնիվ, այդ ծրագրերին կարող է խոչընդոտել տարածաշրջանի աշխարհաքաղաքական իրավիճակը, նշել է Ռուսաստանի միջազգային հարաբերությունների խորհրդի փորձագետ Ալեքսեյ Նաումովը: «Մենք տեսնում ենք, թե ինչպես է պարոն Փաշինյանը ցանկանում նման գիծը տանել՝ Ռուսաստանի հետ անվտանգության և պաշտպանության հարցերում գործընկերություն չի լինելու, բայց տնտեսական համագործակցությունը կմնա։ Չեմ կարծում, որ այդ գիծը կաջակցվի Մոսկվայում հաշվի առնելով Հայաստանի տնտեսության ճնշող կախվածությունը Ռուսաստանի հետ փոխգործակցությունից։ Բացի այդ, անվտանգության հարցերը չափազանց կարևոր են Ռուսաստանի համար։ Կարծում եմ, որ հիմա փորձության է ենթարկվում Կրեմլի համբերությունը։ Մոսկվայի համար կարմիր գիծը կլինի կա՛մ Հայաստանի ՀԱՊԿ-ից ֆորմալ դուրս գալը, կա՛մ Հայաստանի սահմանից, ինչպես նաև Գյումրիում տեղակայված ռազմաբազայից ռուս սահմանապահներին դուրս բերելու որոշումը։ Ինչ վերաբերում է ԵՄ-ին անդամակցելու ծրագրերին, ապա դա լիովին անիրատեսական է։ Դա, ավելի շուտ, մի խոսք է, որը նախատեսված է ցույց տալու Նիկոլ Փաշինյանի վճռականությունը։ Նկատի ունենալով, որ Հայաստանը գտնվում է ոչ թե Եվրամիության հետ սահմանին, ինչպիսին, օրինակ, Ուկրաինան է, այլ Հարավային Կովկասում, և այն հարևան երկրների հարևանությամբ, որոնք ընդհանուր առմամբ բավականին զգուշավոր վերաբերմունք ունեն արևմտյան աշխարհի նկատմամբ, կարծում եմ, որ այս ամենը միտված է հանրապետությունը դարձնելու Հարավային Կովկասում Արևմուտքի մի տեսակ հենակետ և Ադրբեջանի, Ռուսաստանի և մասամբ Վրաստանի վրա ճնշում գործադրելու գործիք, որը, սակայն, անհաջող է լինելու։ Իհարկե, ԵՄ-ն, շահագրգռված լինելով ունակ է որոշակի ժեստերի։ Նա կարող է սահմանափակ աջակցություն ցուցաբերել, այդ թվում ֆինանսական, և գեղեցիկ խոստումներ տալ, բայց այդ ամենի սահմանները լավ դրսևորվել են տասնամյակների ընթացքում տարբեր օրինակներով, թեկուզ հենց Վրաստանի օրինակով»,- ասել է նա:
Նյութը հրապարակման պատրաստեց Կամո Խաչիկյանը
