Նշվել է երկիրը, որի ճակատագիրը պետք է օրինակ դառնա Հայաստանի համար
ՔԱՂԱՔԱԿԱՆՈՒԹՅՈՒՆ
Վրաստանի պատմությունը կարող է օրինակ դառնալ Հայաստանի համար, news.ru-ի հետ զրույցում ասել է ՌԴ Դաշնության խորհրդի անդամ Սերգեյ Ցեկովը։ Նրա խոսքով, Վրաստանի իշխանությունները ժամանակին ունեցել են և՛ Եվրամիությանն անդամակցելու ցանկություն, և՛ Ռուսաստանի հետ վատ հարաբերությունները, բայց միևնույն ժամանակ նրանք հիմա ճիշտ որոշումներ են կայացնում։
«Խելացի մարդիկ սովորում են ուրիշների սխալներից ու հաջողություններից, ճիշտ որոշումներից, իսկ հիմարները սովորում են իրենց սխալների վրա: Հայաստանը կարող է օրինակ վերցնել Վրաստանից, որն ինքն է ժամանակին ունեցել և՛ Եվրամիությանն անդամակցելու ցանկություն, և՛ Ռուսաստանի հետ վատ հարաբերությունները, բայց միևնույն ժամանակ նրանք հիմա ճիշտ որոշումներ են կայացնում»,- ասել է Ցեկովը։
Սենատորը կարծում է, որ Հայաստանը որոշել է գնալ Ուկրաինայի և այն այլ պետությունների ճանապարհով, որոնք փորձում են փչացնել հարաբերությունները Ռուսաստանի Դաշնության հետ։ Նրա կարծիքով զարմանալի է այն, որ հայ ժողովուրդը դեռ սատարում է երկրի վարչապետ Նիկոլ Փաշինյանին։
Ավելի վաղ Փաշինյանն ուղերձ էր հղել Ուկրաինայի նախագահ Վլադիմիր Զելենսկուն։ Նա Երևանի և Կիևի միջև հարաբերությունների հետևողական զարգացման և փոխշահավետ համագործակցության որակական նոր մակարդակի բարձրացման հույս էր հայտնել։
Պետդումայի միջազգային հարաբերությունների հանձնաժողովի նախագահ Լեոնիդ Սլուցկին ավելի վաղ հայտարարել էր, որ Հայաստանի ղեկավարությունը ձգտում է ազատվել թույլ տված սխալների պատասխանատվությունից և փրկություն է փնտրում Արևմուտքում։ Նա ուշադրություն է հրավիրել Ուկրաինայի ճակատագրի վրա, որը ցանկանում էր խզել հարաբերությունները Ռուսաստանի հետ։ Ինչպես նշել է պատգամավորը, հավաքական Արևմուտքն «իր վասալներից» պահանջում է «տոտալ ռուսաֆոբիայի քաղաքականության» ներդրում և կապերի խզում Ռուսաստանի հետ, որին համարում է «աշխարհաքաղաքական թշնամի»։
Նյութը հրապարակման պատրաստեց Կամո Խաչիկյանը
