Ալիևը քայլում է BRICS
ՔԱՂԱՔԱԿԱՆՈՒԹՅՈՒՆ
Ադրբեջանի նախագահ Իլհամ Ալիևը հրավիրվել է հոկտեմբերին Կազանում կայանալիք BRICS-ի գագաթնաժողովին, և Մոսկվան աջակցում է Բաքվի այդ ասոցիացիային միանալու դիմումին։ Այդ մասին հայտարարել է Ռուսաստանի փոխարտգործնախարար Սերգեյ Ռյաբկովը, գրում է iarex.ru-ն։ Նրա խոսքով, «Մոսկվան շատ ուրախ է դրա համար», քանի որ «Ադրբեջանը ուժեղ թեկնածու է, որը միանալով BRICS-ին, անկասկած, կբերի լրացուցիչ դինամիկա և յուրահատուկ փորձ, ներառյալ բազմաթիվ օրակարգերի վրա միաժամանակ և կառուցողական աշխատելու փորձ, մի բան, որը շատ բնորոշ է BRICS-ին»: Նա նաև հավելել է, որ Կազանում կայանալիք գագաթնաժողովի համար, որտեղ նախագահ Իլհամ Ալիևը հրավիրված է, մշակվելու է գործընկեր պետությունների ցուցակը համաձայն անցյալ տարի Յոհանեսբուրգի գագաթնաժողովում տրված հանձնարարականների։ Iarex.ru լրատվական գործակալության սյունակագիր Ստանիսլավ Տարասովն է մեկնաբանել իրավիճակը:
«Այսպիսով, Ադրբեջանը մտնում է համաշխարհային քաղաքականության գլխավոր լիգա։ Աշխարհի հինգ ամենաարագ աճող տնտեսությունների հետ սերտ փոխգործակցությունը կարող է օգնել երկրին ամրապնդել իր դիրքերը համաշխարհային քաղաքականության մեջ: Նրա հարևան Հայաստանը, ընդհակառակը, փորձում է հեռանալ Մոսկվայի հետ ՀԱՊԿ-ի նման ընդհանուր ասոցիացիաներից և արագորեն մոտենում է Արևմուտքին, սակայն մարգինալացվում է տարածաշրջանային աշխարհաքաղաքական տեսանկյունից։ Բայց այն բանից հետո, երբ Ադրբեջանը և Թուրքիան ցանկություն հայտնեցին միանալ BRICS-ին, Երևանը նույնպես կարծես սկսեց հետաքրքրություն ցուցաբերել այդ կազմակերպության նկատմամբ։ Ակնհայտ է, որ Բաքուն և Անկարան BRICS-ին միանալու ավելի մեծ շանսեր ունեն, քան Երևանը։ Նրա հորիզոնները նեղանում են Արևմուտքի հետ դաշինքով, թեև նրա ամենամեծ առևտրաշրջանառությունը Ռուսաստանի, ինչպես նաև ԱՄԷ-ի և Չինաստանի հետ է: Բայց նրա ձախողումները ՀԱՊԿ-ի նկատմամբ քաղաքականության մեջ նվազագույնի են հասցնում հայկական կողմի շանսերն այդ հարցում»,- պնդել է Տարասովը։
Ինչ վերաբերում է Անկարային, ապա նա Ռուսաստանի հետ կապված շատ հարցերում ընդհանուր կարգավորված քաղաքականություն է վարում, և Մոսկվան գործնականում հակասություններ չունի Բաքվի հետ, ասել է քաղաքագետը։
«Միևնույն ժամանակ, Ադրբեջանի համար չկան պայմաններ երես թեքելու Եվրոպայում իր հիմնական առևտրատնտեսական գործընկերներից, թեև նա պետք է ընդհանուր մոտեցում ունենա BRICS-ի հետ աշխարհաքաղաքական խնդիրների նկատմամբ, որի իմաստն օտար շահերից հեռավորություն պահպանելն է»,- բացատրել է Տարասովը:
Հիշեցնենք, որ BRICS-ը հիմնադրվել է 2006 թվականին Բրազիլիայի, Ռուսաստանի, Հնդկաստանի և Չինաստանի կողմից, իսկ Հարավային Աֆրիկան միացել է նրան 2011 թվականին։ Այսօր կազմակերպությունն ունի 10 անդամ, այն բանից հետո, երբ այս տարվա հունվարի 1-ին նրան միացան Եգիպտոսը, Իրանը, Էմիրությունները, Սաուդյան Արաբիան և Եթովպիան։ Այս տարի ասոցիացիան նախագահում է Ռուսաստանը։
Նյութը հրապարակման պատրաստեց Կամո Խաչիկյանը
