Ողբերգական վթար՝ Կոտայքի մարզում

Այսօր՝ օգոստոսի 29-ին, մահվան ելքով ավտովթար է տեղի ունեցել Կոտայքի մարզում: Ժամը 08:20-ի սահմաններում Երևան-Աբովյան ավտաճանապարհի Բալահովիտ բնակավայրի վարչական տարածքում՝ ժողովրդին հայտնի Բալահովիտի գյուղապետարանի մոտ, բախվել են «ՎԱԶ 2109» և «KrAZ» մակնիշի ավտոմեքենաները:

 Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով «ՎԱԶ 2109»-ի վարորդին ավտոմեքենայից դուրս են բերել ՀՀ ներքին գործերի նախարարության փրկարար ծառայության հատուկ նշանակության փրկարարական աշխատանքների իրականացման կենտոնի թիվ 18 փրկարարական ջոկատի փրկարարները՝ օգտագործելով հատուկ տեխնիկա:  

Փրկարարները վարորդին մոտեցրել են օպերատիվորեն ժամանած «Աբովյան» բժշկական կենտրոնի շտապօգնության ավտոմեքենային, սակայն րոպեներ անց վիրավորը, գիտակցության չգալով, մահացել է:  Դեպքի վայր է ժամանել փրկարար ծառայության Կոտայքի մարզային փրկարարական վարչության պետը:

 Ժամանել են նաև ՀՀ ՆԳՆ ոստիկանության Պարեկային ծառայության Կոտայքի մարզի գումարտակի 2-րդ վաշտի 1-ին դասակի պարեկները՝ գումարտակի հրամանատարի տեղակալ Լևոն Բադալյանի, գումարտակի ծառայության ավագ տեսուչ Արտակ Ասատրյանի, գումարտակի ծառայության տեսուչ Կառլեն Բաղյանի, վաշտի հրամանատար Դավիթ Հովհաննիսյանի, դասակի հրամանատար Արմեն Ավետիսյանի և դասակի հրամանատարի տեղակալ Խաչատուր Էլոյանի գլխավորությամբ:Պարեկների այսքան շատ ժամանման պատճառը նրանում է, որպեսզի ճանապարհին խցանում տեղի չունենա:

Դեպքի վայր են ժամանել նաև ոստիկանության Կոտայքի բաժնի օպերատիվ խումբը՝ բաժնի պետի ծառայության գծով տեղակալ Արսեն Սարգսյանի գլխավորությամբ:  Վթարի մասին ոստիկանության Կոտայքի բաժնից տեղեկությունը փոխանցել են ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժին, որտեղից ժամանել է քննչական խումբը՝ վարչության պետ Հովհաննես Չալաբյանի, բաժնի պետ Սերգեյ Ավագյանի և օրվա պատասխանատու հերթապահ քննիչի գլխավորությամբ:Վթարի փաստով Աբովյանի քննչական բաժնում նախաձեռնվել է քրեական վարույթ, որտեղ էլ պարզվում է «KrAZ»-ի վարորդի և «ՎԱԶ 2109»-ի մահացած վարորդի ինքնությունը:  Քննիչի հանձնարարականով՝ ավտոմեքենաները տեղափոխվում են ոստիկանության Կոտայքի բաժնի պահպանվող հատուկ տարածք: