Նախորդ նիստին Տաթևիկ Գրիգորյանի ճառը նման էր դատական դեպարտամենտի ֆիլմի սցենարի տեքստի. Արամ Օրբելյան

Երևանի Առաջին ատյանի դատարանի Կենտրոն նստավայրում այսօր շարունակվեց Սահմանադրական դատարանի նախկին նախագահ Հրայր Թովմասյանի գործով դատական նիստը: Դատավարությունը հասել է պաշտպանական ճառերի փուլին: Թովմասյանի պաշտպաններից Արամ Օրբելյանը ներկայացրեց ճառի մի մասը, իսկ դատական նիստը կշարունակվի վաղը 10:00-ից:

Նշենք, որ դատարանը թույլ տվեց Հրայր Թովմասյանին ներկա գտնվել վաղվա դատական նիստին:

Դատական նիստին Օրբելյանը ցանկանում էր դատարանին բացարկ հայտնելու միջնորդություն ներկայացնել, բայց դատարանը թույլ չտվեց նրան՝ նշելով, որ միջնորդությունը կարող է ներկայացվել դատական նիստի ավարտին:

Դատական նիստի ավարտից հետո Արամ Օրբելյանը լրագրողների հետ զրույցում նշեց՝ ակնհայտորեն առկա էր դատարանին բացարկ հայտնելու միջնորդություն, որը պետք է ներակայացվեր և պետք է ներկայացվեր մինչև հաջորդ գործողություն կատարելը:

«Բացարկի միջնորդության հիմքերը վերաբերվում էին նախորդ նիստի ժամանակ հայտնի դարձած հանգամանքներին և դրա նախորդ նիստերին, որոնք իմ բացակայության ժամանակ տեղի էին ունեցել: Դատարանը որոշում ընդունեց, որ պետք է բացարկի միջնորդությունը ճառից հետո ներկայացվի, բացարկի միջնորդությունը ներկայացվում է այն պահին, երբ առկա է: Ամեն դեպքում ճառը ներկայացվում է, որ տպավորություն չլինի՝ արհեստականորեն հրաժարվում ենք ճառը ներկայացնել»,-ասաց նա:

Օրբելյանին անհասկանալի էր, թե երբ իրեն միջնորդությունը ներկայացնելու իրավունք կտրվի: ««Դատական նիստի ավարտ» ձևակերպումն անհասկանալի երևույթ է: Ենթադրում եմ՝ առնվազն իմ ճառից հետո: Ըստ էության, պետք է թողնվեր, որ հիմա ներկայացնեի, բայց դա խնդիր չէ, այնպես չէ, որ չենք պատրաստվում ճառերին ու միջնորդություններով պետք է ձգենք: Ակնհայտ է, որ նման մտայնություն չունենք»,-ասաց նա:

Օրբելյանն անդրադարձավ իր պաշտպանական ճառին՝ նշելով, թե ինչ հիմքով է կառուցել այն: Նախ նշեց, որ ընդհանրապես ՀՀ Սահմանադրությունը խաթարվել է և ՍԴ դատավորին առաջադրվել է մեղադրանք՝ Սահամանդրությամբ նախատեսված երաշխիքների չպահպանմամբ:

«Անդրադարձ է կատարվելու՝ սույն քրեական գործը հարուցվում էր, երբ Հրայր Թովմասյանին մեղադրանք է առաջադրվել օրենքի խախտումներով՝ օպերատիվ անանուն տեղեկությունների հիման վրա, ինչը օրենքով արգելված է: Ապա անդրադարձ  է կատարվելու, որ մեղադրանքում ներկայացված չեն գործողություններ: Կանդրադառնանք նաև նրան, որ քրեական գործ չկա»,-ասաց նա:

Անդրադառնալով դատավոր Տաթևիկ Գրիգորյանի նախորդ դատական նիստի ժամանակ ելույթին՝ Օրբելյանը նշեց, որ այն ավելի նման էր դատական դեպարտամենտի ֆիլմի սցենարի տեքստի:

«Նրա ճառում ներկայացված տեղեկատվությունն ամբողջությամբ իրականությանը չէր համապատասխանում՝ որոշ տվյալներ ճիշտ էին, որոշ տվյալներ՝ սխալ: Որոշ որակումներ ևս բավականին խնդրահարույց էին»,-ընդգծեց պաշտպանը:

Հիշեցնենք, որ Հրայր Թովմասյանին մեղադրանք է առաջադրվել պաշտոնեական լիազորությունները չարաշահելու համար, որն առաջացրել է ծանր հետևանքներ։ Մեղադրող կողմը պահանջում է 7 տարի ազատազրկում: Թովմասյանը չի ընդունում մեղադրանքը և որակում է այն քաղաքական: