Կան անձինք, որոնց գերեվարման փաստն Ադրբեջանը հրաժարվում է ընդունել, ինչ է կատարվել նրանց հետ՝ չենք կարող ասել. իրավապաշտպան
ՀԱՍԱՐԱԿՈՒԹՅՈՒՆ
«Այս պահին մենք ունենք շուրջ 210 գերի, որոնք արդեն հայրենադարձվել են»: Այդ մասին հրավիրված քննարկման ժամանակ ասաց իրավապաշտպան Սիրանուշ Սահակյանը:
«Շարունակաբար պահվում են 23 հայեր, ես խուսափում եմ այստեղ գերի տերմինը օգտագործելուց, որովհետև պետք է հասկանանք նաև իրավական ռեժիմները: 23-ից 5-ը գերեվարվել են 2020 թվականի պատերազմի ընթացքում, ունենք երկու ռազմագերի, ովքեր հոկտեմբերին մասնակցել են ռազմական գործողություններին: Ունենք 3 քաղաքացիական անձ, ովքեր ձերբակալվել են նոյեմբերի 9-ի հայտարարությանը հաջորդող օրերին, երբ ընդամենը անցել են մի տարածք, որի գրավման մասին տեղեկություն չեն ունեցել: Ունենք 2 քաղաքացիական անձանց ձերբակալում, որոնցից մեկը կապված է եղել բնակավայրում մոլորվելու, մյուսը՝ Կարմիր Խաչի ուղեկցությամբ առողջական նպատակներով ՀՀ տեղափոխվելու հետ, խոսքը Վագիֆ Խաչատրյանի դեպքի մասին է»,-ասաց իրավապաշտպանը:
Սիրանուշ Սահակյանը նշեց, որ մյուս 16 դեպքերը կապված են 2023 թվականի սեպտեմբերի դեպքերի հետ:
«Նրանցից 8-ը գտնվել են այն բնակավայրերում, որտեղ ընթացել են ռազմական գործողություններ, ընդ որում՝ 7-ը եղել են ռազմական գործողությունների մասնակից, 1-ը՝ տարեց բնակիչ: Մյուս 8 դեպքերը կապված են Արցախի նախկին ղեկավարության հետ, որոնք իմ գնահատմամբ, չեն համարվում ո՛չ գերի, ո՛չ էլ ռազմագերի, որովհետև նրանց ազատությունից զրկելը որևէ առնչություն չունի մարտական գործողությունների կամ դրանց արդյունքի հետ: Նրանք քաղաքական պատվերի հիման վրա ձերբակալված, ու այս պահին էլ ապօրինաբար պահվող անձինք են, ովքեր պատժվում են իրենց արտահայտած կարծիքների ու Արցախի ինքնորոշման իրավունքի կայացման ներդրման համար: Կարող ենք ասել, որ նրանց ապօրինի անազատության մեջ պահելն ունի սիմվոլիկ նշանակություն»,-ասաց Սահակյանը:
Վերջինս ընդգծեց նաև, որ գերիների հարցը միայն վերը նշվածով չի սահմանափակվում:
«Կան անձինք, ովքեր մեր ունեցած տեղեկություններով, գերեվարվել են, բայց Ադրբեջանի իշխանությունները հրաժարվում են ընդունել նրանց գերեվարման փաստը: Այստեղ ունենք կրկնակի բարդության խնդիր, նախ ապացուցել, որ նրանք Ադրբեջանում են, ապա տանել աշխատանք նրանց ազատ արձակման ուղղությամբ: Այս անձանց իրավական ռեժիմը գերությունից վեր է ածվել բռնի անհետացած անձանց, թե ինչ է կատարվել նրանց հետ, չենք կարող ասել»,-ընդգծեց Սիրանուշ Սահակյանը:
