«Քաղաքական աղմուկ». փորձագետը գնահատել է Էրդողանի սպառնալիքը թուրքական զորքեր ուղարկել Իսրայել
ՄԻՋԱԶԳԱՅԻՆ
Թուրքիայի նախագահ Ռեջեփ Թայիփ Էրդողանի հայտարարություններն Իսրայել զորքերի հնարավոր տեղակայման մասին պարզապես քաղաքական աղմուկ են և Անկարայի կողմից մահմեդական աշխարհում առաջնորդությունը պահպանելու փորձ, Info24-ի հետ զրույցում նման կարծիք է հայտնել քաղաքագետ Եվգենի Միխայլովը, գրում է rtvi.com-ը։
Փորձագետը նշել է, որ Իսրայելի և Պաղեստինի միջև մարտերը չեն խանգարում Անկարային շարունակել առևտրային հարաբերությունները Երուսաղեմի հետ։
«Կարծում եմ, որ Էրդողանն այս պահին պարզապես քաղաքական աղմուկ է բարձրացնում: Նա այժմ փորձում է ինչ-որ քաղաքական ուղղվածություն որսալ և հասկանալ, թե ի՞նչ պետք է անել, որպեսզի Թուրքիան շարունակի մնալ յուրօրինակ առաջնորդ մահմեդական աշխարհում»,- ասել է Միխայլովը։
Քաղաքագետը նաև ուշադրություն է հրավիրել Էրդողանի կողմից արված որոշ համեմատությունների ոչ կոռեկտության վրա։ Թուրքիայի նախագահն ասել է, որ իր երկրի զորքերը կմտնեն Իսրայել, ինչպես եղավ Հայաստանի և Լիբիայի դեպքում։ Ըստ քաղաքագետի Իսրայելի ռազմական ներուժն անհնար է համեմատել Հայաստանի և Լիբիայի հետ։
«Նախ, նա Ղարաբաղ չի մտել։ Այնտեղ ադրբեջանական բանակն է գերազանց աշխատանք կատարել խորհրդակցելով թուրքական կողմի հետ որպես դաշնակցի։ Եվ ընդհանրապես, Հայաստանն այն մրցակիցը չէ, որի հետ կարելի է համեմատել Իսրայելին։ Լիբիան նույնպես թույլ երկիր էր, երբ թուրքերը մտան այնտեղ»,- հավելել է Միխայլովը։ Նա կասկած է հայտնել, որ Էրդողանը կորոշի իր զորքերն Իսրայել ուղարկել և եզրակացրել է, որ նման սպառնալիքները կմնան միայն «հայտարարությունների մակարդակով»։
Հիշեցնենք, որ վերջերս Էրդողանն ասել է, որ «Իսրայելը չի կարող այդպես վարվել պաղեստինցիների հետ», և Թուրքիան պատրաստ է հակահարված տալ։ Իսկ ընդհանրապես Գազայի հատվածում ռազմական գործողությունների սկսվելուց հետո Թուրքիան հանդես է եկել ի պաշտպանություն Պաղեստինի և դատապարտել Իսրայելին։
Նյութը հրապարակման պատրաստեց Կամո Խաչիկյանը
