Լռության խաղ. ինչո՞ւ է Երևանը խուսափում քննարկել Ղարաբաղում ստեղծված իրավիճակը
ՔԱՂԱՔԱԿԱՆՈՒԹՅՈՒՆ
Բաքվի կողմից Լեռնային Ղարաբաղի դեմ ագրեսիայի հարցը պետք է բարձրացվեր Հայաստանի իշխանությունների կողմից եռակողմ՝ Ռուսաստան-Հայաստան-Ադրբեջան, ձևաչափով, սակայն պաշտոնական Երևանը լռեց, ինչն էլ պայմաններ ստեղծեց Արցախի հայաթափման համար, «Մենք» նախագծի շրջանակներում Sputnik Արմենիա ռադիոկայանին տված հարցազրույցում նման կարծիք է հայտնել Ղարաբաղի խորհրդարանի «Արդարություն» խմբակցության ղեկավար Դավիթ Գալստյանը, գրում է dzen.ru-ն։
«Երբ Հայաստանի իշխանությունները բոլոր խնդիրների մեջ մեղադրում են ռուս խաղաղապահներին, կարելի է շատ պարզ հարց ձևակերպել. իսկ ո՞վ է ստորագրել այն եռակողմ հայտարարությունը, ըստ որի խաղաղապահները հայտնվել են Արցախում: Ի վերջո, այն ծրագրում, որը Հայաստանի ներկայիս իշխանությունները ներկայացրել են 2021 թվականի նախընտրական քարոզարշավի ժամանակ առանձին պարբերությունում ասվում է, որ Արցախի անվտանգության երաշխավորը խաղաղապահ առաքելությունն է։ Այսպիսով, նրանք փորձում են ցույց տալ, որ Հայաստանի իշխանություններն այլևս անվտանգության երաշխավորը չեն, և գործնականում այդպես էր 2023 թվականի սեպտեմբերին»,- նշել է Գալստյանը։
Նա ընդգծել է, որ ղարաբաղցիները՝ որպես 2020 թվականի նոյեմբերի 9-ի եռակողմ հայտարարության շահառուներ, կարող են դիմել բոլոր երեք կողմերին, այդ թվում՝ Հայաստանին, պաշտպանելու իրենց իրավունքները։ Սակայն, երբ Ադրբեջանը խախտեց այդ պայմանագրի պայմանները, պաշտոնական Երևանը լռեց։
Հայաստանից դատապարտող հայտարարություններ չեղան: Ընդհակառակը, Հայաստանի իշխանությունները թե՛ խաղաղապահների, թե՛ Մոսկվայի հետ խնդիրը բարձրացնելու փոխարեն Լեռնային Ղարաբաղը ճանաչեցին որպես Ադրբեջանի մաս, և դա էլ խոչընդոտներ ստեղծեց հայերի կողմից ԼՂ-ի պահպանման համար, ասել է Sputnik Արմենիայի զրուցակիցը։
Նրա խոսքով, ռուս խաղաղապահները Լեռնային Ղարաբաղի ներկայացուցիչներին ասել են, որ իրենց հանդիպումները չեն կարող կրել պաշտոնական կամ հրապարակային բնույթ, քանի որ դրանք եղել են Հայաստանի, Ռուսաստանի և Ադրբեջանի եռակողմ հայտարարության հիման վրա։ Ըստ այդմ խնդիրների դեպքում Հայաստանը պետք է հարցեր ուղղեր ոչ թե խաղաղապահներին, այլ դա իրականացներ եռակողմ ձևաչափով։
«Հայկական կողմն ամեն կերպ խուսափում է եռակողմ ձևաչափից, ամեն ինչում փորձում է մեղավորներ գտնել, և տեղի ունեցածի հերթապահ մեղավոր է նշանակվել ռուսաստանյան խաղաղապահ զորախումբը: Մեղադրվել են նաև բողոքի ակցիաները, և դա չնայած նրան, որ Արայիկ Հարությունյանը (ԼՂ նախկին ղեկավար) արդեն շրջափակման վերջին ամիսներին իր ելույթներում դիմում էր Հայաստանի իշխանություններին, քանի որ Արցախն այլևս չէր կարող միայնակ դիմակայել թուրք-ադրբեջանական տանդեմին, սակայն Հայաստանի կողմից որևէ քայլ չձեռնարկվեց»,- նշել է Գալստյանը։
Լեռնային Ղարաբաղի ներկայացուցիչները բազմիցս են կոչ արել Երևանին կազմակերպել Ադրբեջանի օդային շրջափակում, հայտարարել ամբողջ աշխարհին, որ Հայաստանի օդային տարածքով թռիչքներն արգելված են ադրբեջանական ինքնաթիռների համար, քանի որ Ադրբեջանը չի կատարում Հաագայի դատարանի որոշումը և չի ապաշրջափակում Լաչինի միջանցքը: Միաժամանակ առաջարկվել է կոչ անել հարևան երկրներին միանալ այդ պատժամիջոցներին, սակայն ոչինչ չի արվել, ասել է քաղաքական գործիչը։
«Մենք կոչ արեցինք հայկական կողմին հետ չկանգնել եռակողմ հայտարարությունից, որի շնորհիվ մենք կարող էինք շարունակել ապրել Արցախում, սակայն, ինչպես տեսանք պրակտիկայում, Հայաստանի իշխանությունները ձեռնարկեցին քայլեր, որոնք միայն քաջալերեցին ադրբեջանական կողմին իրականացնել ղարաբաղցիների բռնի տեղահանում: Եվ այսօր, երբ մենք կոչ ենք անում այսօրվա իշխանություններին չհրաժարվել Արցախի ժողովրդի վերադառնալու իրավունքից, տեսնում ենք, որ նրանք հիմա էլ մեզ չեն լսում»,- ասել է նա։
Եզրափակելով Գալստյանը նշել է, որ Հայաստանի իշխանությունները զարմանք են հայտնում, երբ ղարաբաղցիները միանում են բողոքի ակցիաներին: Նրանք խոսում են միայն ներքին տեղահանվածների սոցիալական խնդիրների լուծման մասին։ Սակայն ՀՀ կառավարության բնակարանային ծրագիրը նման է «միգրացիոն ծրագրի», քանի որ այնպիսի պայմաններ են ստեղծվում, որպեսզի ղարաբաղցիները չկարողանան բնակարան ձեռք բերել Հայաստանում և լքեն երկիրը։
Նյութը հրապարակման պատրաստեց Կամո Խաչիկյանը
