Թրամփը մահափորձից հետո առաջին հարցազրույցն է տվել՝ ասելով՝ ինչն է փրկել իր կյանքը

ԱՄՆ նախագահի թեկնածու Դոնալդ Թրամփը Փենսիլվանիայում իր դեմ մահափորձից հետո առաջին հարցազրույցն է տվել:

«Ես հազվադեպ եմ ամբոխից հայացքս թեքում: Եթե այդ պահին նույն կերպ վարվեի, այսօր միասին չէինք զրուցի, այնպես չէ՞: Ամենաանհավանականն այն էր, որ ես ոչ միայն շրջվեցի, այլև շրջվեցի ճիշտ ժամանակին և ճիշտ չափով: Եթե ես միայն կես շրջադարձ կատարեի, գնդակը կհարվածեր ուղեղիս հետևին և կանցներ իմ գանգով: Եվ քանի որ էկրանը բարձր էր, ես վեր նայեցի: Կատարյալ շրջադարձ անելու հավանականությունը շատ փոքր էր, ուստի ես այստեղ չպետք է լինեի, պետք է մեռած լինեի», - New York Post-ին ասել է Թրամփը:

Թրամփը նաև գովել է հանրահավաքի ամբոխին, որը հավաքել է 55 հազար մարդ, հանգստություն պահպանելու համար:

«Շատ վայրեր, հատկապես ֆուտբոլային խաղեր, լսվում է մեկ կրակոց, բոլորը վազում են: Այստեղ շատ կրակոցներ եղան ու մարդիկ մնացին»,- ասել է նա և հավելել,- «Ես սիրում եմ նրանց։ Նրանք այնքան մեծ մարդիկ են»:

Թրամփն ասել է նաև, որ դիպուկահարն իր դեմ մահափորձ իրականացնողին՝ Թոմաս Մեթյու Քրուքսին, սպանել է «ուղիղ աչքերի միջև մեկ կրակոցով»:

Այնուհետև Թրամփը գովել է Գաղտնի ծառայության, անվտանգության աշխատողների արագությունը:

«Նրանք ֆանտաստիկ աշխատանք կատարեցին», - հավելել է նա:

Թրամփի խոսքով՝ «գործակալներն այնքան ուժեղ են իրեն բռնել ու գետնին տապալել, որ կոշիկները հագից դուրս են եկել»։

Հիշեցնենք, որ հուլիսի 14-ին ԱՄՆ Փենսիլվանիա նահանգում աջակիցների հետ հանրահավաքի ժամանակ նախագահի հանրապետական թեկնածու Դոնալդ Թրամփի դեմ մահափորձ է իրականացվել: