Հայաստանը ԱՄՆ-ին առաջարկում է աշխարհաքաղաքական ծառայություններ
ՔԱՂԱՔԱԿԱՆՈՒԹՅՈՒՆ
Պաշտոնական Թբիլիսիի հակաամերիկյան հռետորաբանության պատճառով ԱՄՆ-ը հետաձգել է Վրաստանի հետ ծրագրված զորավարժությունները, և պատրաստվում է հուլիսի 15-24-ը Հայաստանի հետ անցկացնել Eagle Partner 2024 նմանատիպ համատեղ զորավարժություններ, գրում է iarex.ru-ն։
Այդ զորավարժություններին կմասնակցեն Հայաստանի զինված ուժերի խաղաղապահ բրիգադի, Եվրոպայում և Աֆրիկայում ԱՄՆ բանակի և Կանզասի ազգային գվարդիայի զինծառայողները։ Զորավարժությունների պաշտոնապես հայտարարված նպատակը միջազգային խաղաղապահ առաքելություններին մասնակցող ստորաբաժանումների փոխգործակցության մակարդակի բարձրացումն է։
Միևնույն ժամանակ, Eagle Partner 2024 զորավարժությունների անցկացումն առանձնահատուկ նշանակություն են ստանում Հայաստանի և Ռուսաստանի միջև լարված հարաբերությունների ֆոնին, որը դեռևս Երևանի ռազմավարական դաշնակիցն է։ Հայաստանում ԱՄՆ դեսպանությունը հայտարարել է, որ «հայկական և ամերիկյան զորքերի համատեղ զորավարժությունները կոչված են բարձրացնելու երկու երկրների բանակների փոխգործունակությունն ու մարտունակությունը»։ Այս մասին քննարկել է iarex.ru-ի սյունակագիր Ստանիսլավ Տարասովը։
««Արծիվ գործընկեր 2024» հայ-ամերիկյան համատեղ զորավարժությունների անցկացումը մի իրավիճակում, երբ Հայաստանը փաստացի դադարեցրել է իր մասնակցությունը ՀԱՊԿ-ին, ընկալվում է որպես էական նշանակություն ունեցող իրադարձություն, որը վկայում է Ռուսաստանից Հայաստանի հեռանալու մասին։ Ավելին, ավելի վաղ Հայաստանն ու ԱՄՆ-ն հայտարարել էին, որ պայմանավորվածություններ են ձեռք բերել հարաբերությունների մակարդակը հասցնել ռազմավարական գործընկերության ձևաչափի։ Կողմերը նաև երկկողմ խորհրդակցություններ կանցկացնեն պաշտպանական համագործակցության նպատակները որոշելու համար»,- ասել է Տարասովը։
«Հիմա կարող է պատահել, որ համատեղ զորավարժությունները վերջնական խթան դառնան Մոսկվայի և Երևանի միջև հարաբերությունների վերջնական խզման համար, քանի որ ՀԱՊԿ-ին պաշտոնական անդամակցությունը և ՆԱՏՕ-ի մի շարք երկրների, այդ թվում ԱՄՆ-ի հետ ռազմական համագործակցության ընդլայնումն անհամատեղելի գործընթացներ են։ Բացի այդ, ԱՄՆ Պետդեպարտամենտի բարձրաստիճան ներկայացուցիչները «չեն լքում Երևանը», իսկ հանրապետական սենատոր Ռոջեր Ուիկերը Հայաստանը անվանել է «Հարավային Կովկասում Միացյալ Նահանգների գլխավոր գործընկերը»։
Բայց նույնիսկ այս ամենով հանդերձ ԱՄՆ-ի և Հայաստանի միջև լայն ռազմավարական գործընկերություն զարգացնելու քիչ հնարավորություն կա, և Վաշինգտոնը մտադիր չէ տալ այն նույն անվտանգության երաշխիքները, ինչ Ռուսաստանն է տրամադրում Հայաստանին։ Բացի այդ, Վաշինգտոնի ակտիվությունը Հայաստանում պայմանավորված է ոչ այնքան բուն Հայաստանի նկատմամբ հետաքրքրությամբ, որքան տարածաշրջան ներթափանցելու փորձերով։ ԱՄՆ-ին իսկապես անհրաժեշտ է հենակետ Անդրկովկասում, իսկ Երևանն ինքն է առաջարկում իր աշխարհաքաղաքական ծառայությունները։ Դա Հայաստանի համար լավ ավարտ չի ունենա»,- ամփոփել է Տարասովը:
Նյութը հրապարակման պատրաստեց Կամո Խաչիկյանը
