Հրանտ Գրիգորյանի մահվան գործով կալանավորված սպան այլ զինծառայողների էլ է ծեծել. զինծառայողի հայր

Ժամկետային զինծառայող Հրանտ Գրիգորյանի մահվան գործով կալանավորված, նրան ծեծելու, վիրավորանք հասցնելու մեջ մեղադրվող՝ դասակի հրամանատար Վ. Բալայանը նախկինում այլ զինվորների էլ է ծեծել: Այս մասին NEWS.am-ին ասաց Հրանտ Գրիգորյանի հայրը՝ Գարուշ Գրիգորյանը:

«Համագյուղացիներն իր մասին շատ վատ բաներ են պատմում: Ինքը նախկինում էլ ընկել է նման պատմությունների մեջ: Ու մենք զարմանում ենք, թե ոնց է ինքը շարունակել զինվորական ծառայությունը»,- ասաց զինծառայողի հայրը:

Գարուշ Գրիգորյանը նշեց, որ իրենք այցելել են Հրանտ Գրիգորյանի զորամաս ու իրենց կասկածները այն մասին, որ Հրանտն ինքնասպան չի եղել, հաստատվել են:

«Բոլորը վախեցած էին, հարցնում էի՝ Հրանտին ճանաչում են, թե ոչ, ասում էին՝ հա, ճանաչում ենք, լավ տղա է ու մնացած բոլոր հարցերին պատասխանում էին հենց նույն, անգիր արած բառերով»,- նշեց նա՝ նշելով, որ ինքը վստահ է, որ որդին ինքնասպան չի եղել:

Ըստ ՔԿ տվյալների՝ դասակի հրամանատարը դեպքի նախորդող օրը՝ հունիսի 16-ին, ֆիզիկական բռնություն է գործադրել զինծառայողի նկատմամբ:

Նշենք, որ Վ. Բալայանին մեղադրանք է առաջադրվել ՀՀ ՔՕ 358.1-րդ հոդվածի 2-րդ մասով (Զինվորական ծառայության պարտականությունները կատարելու կապակցությամբ ստորադասին (ենթակային) ծեծելը կամ նրա նկատմամբ այլ բռնություն գործադրելը) եւ 360-րդ հոդվածի 2-րդ մասով (Զինծառայողին վիրավորանք հասցնելը պետի (հրամանատարի) կողմից ստորադասի (ենթակայի) նկատմամբ զինվորական ծառայության պարտականությունները կատարելու կապակցությամբ): Քննիչը միջնորդություն է ներկայացրել դատարան՝ նրա նկատմամբ որպես խափանման միջոց կալանավորումը կիրառելու վերաբերյալ, ինչը բավարարվել է:

1997թ. ծնված Հրանտ Գարուշի Գրիգորյանը հունիսի 17-ին` ժամը 10:45-ի սահմանում, հարավարեւելյան ուղղությամբ տեղակայված զորամասերից մեկի մարզումների անցկացման վայրում, դեռեւս չպարզված հանգամանքներում, մահացու հրազենային գնդակային վիրավորում էր ստացել:

Հրանտ Գրիգորյանն արմատներով Արարատի մարզի Մրգավան գյուղից էր, սակայն, ընտանիքով բնակվում էր Արտաշատում: Նրա հայրը Ռուսաստանում արտագնա աշխատանքի էր, ընտանիքն այնքան էլ լավ պայմաններում չի ապրում: Հրանտ Գրիգորյանն ընտանիքի միակ տղան էր, ունի իրենից փոքր քույր:

Նշենք, որ զինծառայողի մահվան դեպքով քրեական գործ է հարուցվել ինքնասպանության հասցնելու հատկանիշներով: