Արժույթի Միջազգային Հիմնադրամը Հայաստանին խորհուրդ է տալիս վաճառել պետական ակտիվները և նվազեցնել հարկային արտոնությունները
ՔԱՂԱՔԱԿԱՆՈՒԹՅՈՒՆ
ԱՄՀ-ն խորհուրդ է տալիս ՀՀ կառավարությանը վաճառել վերջին տարիներին ստացված խոշոր ընկերությունների բաժնետոմսերը. հիմնադրամի կարծիքով՝ դրանք կառավարությանը չեն օգնում որևէ առաջադրանքի կատարման հարցում։ Հիմնադրամն առաջարկում է նաև կրճատել ԱԱՀ-ով չհաշվառվող ճյուղերի շրջանակը։
Հայաստանն արձանագրում է բարձր տնտեսական աճ և համեմատաբար բարենպաստ տնտեսական միջավայր։ 2023 թվականին երկրի տնտեսությունն աճել է 8,7 տոկոսով, 2024 թվականին ԱՄՀ-ն ակնկալում է 6 տոկոս աճ (և միգուցե մի փոքր ավելի)։ Այդ մասին Sputnik Արմենիայի հետ զրույցում ասել է Արժույթի միջազգային հիմնադրամի Մերձավոր Արևելքի և Կենտրոնական Ասիայի փոխտնօրեն Թանոս Արվանիտիսը, գրում է dzen.ru-ն։
Հիմնադրամը հասկանում է, որ կառավարությունը պետք է լրացուցիչ միջոցներ հատկացնի Լեռնային Ղարաբաղից փախստականների և ամբողջ հանրապետության ենթակառուցվածքների զարգացման համար, ասել է Արվանիտիսը։
Ինչ վերաբերում է պարտքի կառուցվածքին, ապա կառավարությունը վերջին տարիներին կրճատում է արտաքին պարտքը և ավելացնում ներքին պարտքը (պարտատոմսերը)։ Հիմնադրամի կարծիքով այդ մոտեցումը խելամիտ է, քանի որ համաշխարհային ֆինանսական շուկաներում տոկոսադրույքներն այժմ բավականին բարձր են (և դրանցից են կախված նաև արտաքին վարկերի տոկոսադրույքները)։
Բայց քանի որ համաշխարհային գնաճը նվազում է, ֆինանսական տոկոսադրույքները նույնպես պետք է իջնեն զուգահեռաբար: Հետևաբար, պետք է հավասարակշռություն պահպանվի ներքին և արտաքին պարտքերի միջև, քանի որ գանձապետական պարտատոմսերի ավելցուկը կարող է նվազեցնել ներդրողների ախորժակը (որոնք, դժվարություններով և ռիսկերով բիզնես զարգացնելու փոխարեն, ներդրումներ կկատարեն գործնականում առանց ռիսկերի պետական պարտատոմսերում) և Արտաքին վարկերի ավելցուկը կարող է կառավարությանը խոցելի դարձնել փոխարժեքի տատանումների նկատմամբ։ Հիմնադրամի կարծիքով չափազանց կարևոր է պետական պարտքի պահպանումը չափավոր սահմաններում, ինչպես հիմա է (ներկայիս մակարդակը ՀՆԱ-ի 48 %-ն է կազմում, որը կարելի է չափավոր համարել)։
Ըստ ԱՄՀ-ի պետությունը պետք է որոշի, թե ինչ նպատակների է ուզում հասնել խոշոր ձեռնարկությունների բաժնետերերի օգնությամբ, Sputnik Արմենիային ասել է Հայաստանում ԱՄՀ մշտական ներկայացուցիչ Ումանգ Ռավատը։ Այդ հարցերի շուրջ Հիմնադրամը խորհրդատվական աջակցություն է ցուցաբերել ֆինանսների նախարարությանը պետական գույքի կառավարման քաղաքականության մշակման համար (առայժմ դրա համար հայեցակարգային մոտեցումներն են մշակվել):
«Մեր կարծիքով այդ բաժնետոմսերը չեն կատարում այն նպատակներից որևէ մեկը, որին սովորաբար ձգտում է կառավարությունը, ուստի ցանկալի է վաճառել այդ բաժնետոմսերը։ Իհարկե, ընտրությունը կառավարությանն է, մենք միայն խորհուրդ ենք տալիս: Բայց կան հարցեր. եթե խոշոր ընկերություններում սեփականությունը ծառայում է ինչ-որ նպատակի, ապա ի՞նչ նպատակի, և եթե ոչ մի նպատակի, ապա ի՞նչ է արվելու դրա հիման վրա»,- հավելել է Ռավատը:
Քննարկման այլ կարևոր թեմաներից են նոր շենքերի հիփոթեքային վարկերի հարկային արտոնությունները: Հիմնադրամը երկար ժամանակ քննարկում էր այդ հարցը, և այժմ պետությունն աստիճանաբար վերացնում է այդ արտոնությունները, հիշեցրել է Ռավատը։
Արժույթի միջազգային հիմնադրամի այլ առաջարկները ներառում են ԱԱՀ գանձում մոլախաղերի, առողջապահության և բանկային և ապահովագրական ծառայությունների համար: Հիմնադրամը պատրաստ է խորհրդատվություն տրամադրել այդ հարցերի շուրջ, հավելել է Ռավատը։
Նյութը հրապարակման պատրաստեց Կամո Խաչիկյանը
