Հայտնի է դարձել, թե ինչու է Ֆրանսիան ռազմական պայմանագիր կնքել Հայաստանի հետ
ՔԱՂԱՔԱԿԱՆՈՒԹՅՈՒՆ
Ֆրանսիան ակտիվացել է Հարավային Կովկասում Ռուսաստանի համար չափազանց շահավետ Հյուսիս-Հարավ միջանցքի ստեղծմանը հակազդելու և Հայաստանին այդ նախագծին միանալուց բացառելու համար, կարծում է ռազմական քաղաքագետ, Պլեխանովի անվան ռուսական տնտեսագիտական համալսարանի քաղաքական վերլուծության ամբիոնի դոցենտ Ալեքսանդր Պերենջիևը, գրում է rambler.ru-ն: Նրա խոսքով, Հայաստանը բացահայտորեն անցնում է Ռուսաստանի թշնամիների կողմը, թեև առայժմ ֆորմալ առումով մնում է Մոսկվայի դաշնակիցը ՀԱՊԿ-ում։
«Երևանը Ռուսաստանի համար դե յուրե բարեկամ, բայց դե ֆակտո թշնամական պետություն է։ Այդ երկրի իշխանությունները հարաբերություններ են հաստատում ՆԱՏՕ-ի ամենաակտիվ երկրներից մեկի՝ Ֆրանսիայի հետ, որը հավակնում է առաջատար լինել եվրոպական հակառուսական բլոկում։ Փարիզը փորձում է կանխել Հյուսիս-Հարավ միջանցքի ստեղծումը և Հայաստանի միանալն այդ նախագծին։ Արևմուտքում հասկանում են, որ միջանցքը դարձել է նոր տնտեսական մոդել, որի հետ իրենք կապ չունեն։ Եվ դա տնտեսական հիմքն է հենց այն բազմաբևեռ աշխարհի ձևավորման համար, որին ձգտում է Ռուսաստանը»,- ասել է Պերենջիևը։
Նրա խոսքով, Ֆրանսիայի նախագահ Էմանուել Մակրոնը փորձում է պահպանել Բաքվի և Երևանի միջև կոնֆլիկտային հարաբերությունները և կանխել խաղաղության պայմանագիրն ու սահմանագծումը։
«Նրանք չեն անհանգստանում Ղարաբաղի համար, նրանք ուզում են հրդեհ բռնկել Կովկասում, որը Ռուսաստանի կողքին է։ Հիմնական նպատակը Հայաստանի տարածքում ՆԱՏՕ-ի և ԱՄՆ-ի բազաների ստեղծումն է։ Դրա համար էլ դուրս են մղում Ռուսաստանի զինված կառույցներին»,- եզրափակել է քաղաքագետը։
Ավելի վաղ հայտնի էր դարձել, որ Հայաստանն ու Ֆրանսիան պայմանագիր են կնքել CAESAR ինքնագնաց հրետանային համակարգերի մատակարարման մասին։ Փարիզը նույն ինքնագնաց հաուբիցներն է մատակարարում նաև Կիևին։ Պայմանագիրը ստորագրվել է Հայաստանի պաշտպանության նախարարության ղեկավար Սուրեն Պապիկյանի Փարիզ կատարած այցի ընթացքում։ Eurosatory 2024 ռազմական տեխնիկայի ցուցահանդեսում նա հանդիպել է ֆրանսիացի գործընկեր Սեբաստիեն Լեկորնուի հետ։
Նյութը հրապարակման պատրաստեց Կամո Խաչիկյանը
