Փորձագետները հայտարարել են ռուսական բազաներն ամերիկյանով փոխարինելու Հայաստանի մտադրության մասին
ՔԱՂԱՔԱԿԱՆՈՒԹՅՈՒՆ
Հայաստանը ծրագրում է ռուսական ռազմակայանները փոխարինել ամերիկյանով, գրում է iz.ru-ն:
Անցյալ տարվա նոյեմբերին Հայաստան էր այցելել Հարավային Կովկասում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինան։ Հենց այդ ժամանակ Երևանում որոշում ընդունվեց ընդլայնել երկրի ռազմական համագործակցությունը Հյուսիսատլանտյան դաշինքի հետ։
«Մենք շատ ոգևորված ենք այն որոշումներից, որոնք Հայաստանը որոշել է ընդունել իր արտաքին և պաշտպանական քաղաքականության մեջ։ Ես գիտեմ, որ այդ լուծումը դժվար է իրականացնել և, հավանաբար, երկար ժամանակ կպահանջի, բայց, իհարկե, մենք խրախուսում ենք մեր գործընկերներին մերձենալ մեզ հետ, և դա այն է, ինչ անում է Հայաստանը», - ասել է Կոլոմինան:
Երևանում ընդունել են նաև Հունաստանի պաշտպանության նախարար Նիկոս Դենդիասին։ Հունաստանում Հայաստանի դեսպան Տիգրան Մկրտչյանն ընդգծել է, որ Դենդիասի պաշտոնական այցը «նոր լիցք կհաղորդի ռազմական ոլորտում երկու երկրների համագործակցության ընդլայնմանը»։
«Ի՞նչ շահեր է հետապնդում ՆԱՏՕ-ն այդ առումով և մասնավորապես Հայաստանում։ Դա համագործակցության շարունակություն է Աֆղանստանում ՆԱՏՕ-ի շահերն ապահովելու համար։ Երկրորդ ասպեկտը, որը քննարկվում է, վերաբերվում է ռազմա-տեխնիկական համագործակցությանը, ռազմակայանների ստեղծմանը, Հայաստանի սպառազինությունների վերակողմնորոշմանը։ Այսինքն Հայաստանը Ուկրաինայի հետ մեկտեղ երկրորդ ճակատ բացելու դաշտ է»,- նշել է ՌԴ կառավարությանն առընթեր Ֆինանսական համալսարանի սոցիալական գիտությունների և զանգվածային հաղորդակցությունների ֆակուլտետի պրոֆեսոր Մարինա Գալասը։
Մամուլը ևս գրում է, որ ՆԱՏՕ-ն և Վաշինգտոնն ակտիվորեն բանակցում են Երևանի հետ երկրում իրենց ռազմակայանների կառուցման վերաբերյալ և Արևմտյան ռազմական դաշինքն արդեն սկսել է Հայաստանի զինված ուժերին ինտեգրվելու գործընթացը։ The Wall Street Journal-ը գրել է, որ ԱՄՆ բանակը նախատեսում է գրավել ռուսական ռազմաբազաները Հայաստանում, և վարչապետ Նիկոլ Փաշինյանը հավանություն է տվել դրան։
«Փաշինյանը միշտ եղել է արևմտամետ քաղաքական գործիչ, հիմա պարզապես ուզում է օգտվել այս պահից և իրավիճակը շրջել դեպի Արևմուտք։ Փաշինյանը շատ կցանկանար, որ Հայաստանը դառնա Եմ անդամ, ՆԱՏՕ-ի անդամ, այնտեղ տեղակայվեին թե՛ ԱՄՆ-ի, թե՛ Ֆրանսիայի ռազմակայանները»,- ասել է Քաղաքական հետազոտությունների ինստիտուտի տնօրեն Սերգեյ Մարկովը։
Տարածված լուրերի ապացույցն այն է, որ դեռ 2021 թվականին Վաշինգտոնը 45 մլն դոլար է հատկացրել Հայաստանում և Վրաստանում ռազմական ենթակառուցվածքների կառուցման և զարգացման համար։ Պենտագոնը նկարագրում է այդ ծախսերը որպես «ԱՄՆ-ի պաշտպանական գործունեությանն աջակցություն»:
«Միացյալ Նահանգները ներկա է այդ տարածաշրջանում գրեթե 2000-ականներից: Եվ պետք չէ մտածել, որ դրանք ֆինանսական հատկացումներ են, որոնք հատկացվել են բացառապես վերջերս։ ԱՄՆ-ն իրականում գումար է հատկացնում Անդրկովկասում տարբեր նախագծերի համար։ Նա, գիտի թե ինչ է անում և, բնականաբար, լրացուցիչ միջոցներ է նախապատրաստում Ռուսաստանի վրա ազդելու համար»,- ասել է Եվրասիական ինտեգրացիայի հետազոտական կենտրոնի փորձագիտական խմբի ղեկավար Օլեգ Նոգինսկին։
Արևմտյան մամուլը նաև գրում է, որ շուտով Երևանի հենց կենտրոնում կարող է հայտնվել ամերիկյան լայնածավալ ռազմաբազա։ Այն տեղակայվելու է ամերիկյան դեսպանատան տարածքում։ Դա ԱՄՆ-ի ամենամեծ դեսպանատներից մեկն է աշխարհում. 14 հազար քմ տարածք, մոտ 50 սմ լայնությամբ մոնոլիտ բետոնից հինգ շենք, ըստ ոչ պաշտոնական տվյալների, ամերիկյան դեսպանատունը գետնի տակ է անցնում ինը հարկով և ունի ինքնավար էներգա և ջրամատակարարման համակարգեր, ընդ որում դեսպանատան շենքերից մեկը նախատեսված է ԱՄՆ ծովային հետևակի համար, և ընդամենը 10 տարի առաջ այնտեղ տեղակայվել էր մոտ հազար ամերիկացի զինվոր։
«Իհարկե, նրանք կփորձեն այնտեղ տեղակայել իրենց հենակետերը։ Նրանք կհամոզեն Հայաստանին դուրս մղել մեր զինվորականներին այնտեղից։ Հիմա արդեն պատրաստվում են օդանավակայանից հեռացնել մեր սահմանապահներին, չնայած պայմանավորվածություն կար, որ սահմանը հսկեն մեր սահմանապահները։ Հիմա դա իրենց հարիր չէ։ Հասկանալի է, որ ամերիկացիներն են հիմա մտնում այնտեղ, որպեսզի մեզ ցավ պատճառեն։ Հայաստանից նրանք կստեղծեն երկրորդ Ուկրաինան»,- նշել է 1-ին աստիճանի կապիտան Վասիլի Ֆատիգարովը։
Ոչ վաղ անցյալում ԱՄՆ բանակի հարյուրավոր անձնակազմեր են ժամանել Հայաստան փոխգործունակության վարժանքներ անցկացնելու համար։ ԱՄՆ-ը 65 միլիոն դոլար է հատկացրել Հայաստանին իր հակառուսական քաղաքականության համար, իսկ Եվրամիությունը պատրաստ է ևս 270 միլիոն եվրո ներդնել Փաշինյանի կառավարությունում։
«Եվրամիության կողմից կաջակցվի Հայաստանի կայունությունն ու աճը: 270 միլիոն եվրո դրամաշնորհներ ենք հատկացնելու: Առաջիկա չորս տարիների ընթացքում մենք ներդրումներ կկատարենք Հայաստանի տնտեսությունը կառուցելու և հասարակությունն ավելի կայուն դարձնելու համար»,- ասել է Եվրահանձնաժողովի նախագահ Ուրսուլա ֆոն դեր Լեյենը։
Նյութը հրապարակման պատրաստեց Կամո Խաչիկյանը
