Տարբեր երկրներից փորձագետներ մասնակցել են ԵԽ Երևանի գրասենյակի կազմակերպած համաժողովին
ՔԱՂԱՔԱԿԱՆՈՒԹՅՈՒՆ
Եվրոպայի Խորհրդի Երևանի գրասենյակը կազմակերպել էր «Քրեական արդարադատության վերականգնողական արդյունավետ մոտեցումների ուսումնասիրություն. միջազգային մոտեցումներ» խորագրով համաժողով, որին մասնակցել են տարբեր երկրների մասնագետներ և փորձագետներ:
Ինչպես տեղեկացնում է Երևանում ԵԽ գրասենյակը, «Ազատությունից զրկված անձանց իրավունքների պաշտպանության ամրապնդումը» և «Աջակցություն Հայաստանում պրոբացիայի ծառայության հզորացմանը» ծրագրերի շրջանակներում Պոմպիդու խմբի և Եվրոպական պրոբացիայի կոնֆեդերացիայի հետ համագործակցությամբ կազմակերպված այս համաժողովը նպատակ ուներ խթանել բովանդակալից քննարկում և փոխանակել տեսակետներ միջազգային համատեքստում վերականգնողական պրակտիկայի վերաբերյալ՝ քրեական արդարադատության առանցքային նպատակների տեսանկյունից՝ աշխարհում հասարակական անվտանգության բարձրացման և ռեցիդիվի մակարդակի նվազման նպատակով։
Երկու ծրագրերն էլ Եվրոպայի խորհրդի 2023-2026 թվականների՝ Հայաստանի համար գործողությունների ծրագրի մաս են կազմում։
Եվրոպայի խորհրդի փորձագետները ներկայացրել են լավագույն փորձը և օրինակները այնպիսի թեմաների շուրջ, ինչպիսիք են՝ վերականգնողական աշխատանքների կարևորությունը ռեցիդիվ հանցագործությունների նվազեցման և սոցիալական ներառման խթանման համար, հատուկ իրավախախտների խմբերի հատուկ խնդիրների և կարիքների լուծման, ինչպես նաև ծրագրերի ազդեցության չափման և արդյունավետության գնահատման թեմաներով։
Միջոցառմանը մասնակցեցին Արդարադատության նախարարության, Պրոբացիայի և Քրեակատարողական ծառայությունների, ինչպես նաև՝ քաղաքացիական հասարակության կազմակերպությունների ներկայացուցիչներ:
Բացման խոսքով հանդես եկան Եվրոպայի Խորհրդի Երևանի գրասենյակի ղեկավար Մաքսիմ Լոնգանգեն, Եվրոպայի խորհրդի Թմրամիջոցների և կախվածությունների միջազգային համագործակցության խմբի (Պոմպիդու խումբ) գործադիր քարտուղար Դենիս Հուբերը։
«Նրանք լիահույս են, որ վերականգնողական աշխատանքները կարևոր դեր են խաղում ռեցիդիվ հանցագործությունների նվազեցման և սոցիալական ներառման համար։ Այս առումով համագործակցությունը չափազանց կարևոր է, և Եվրոպայի խորհուրդը կշարունակի աջակցել Հայաստանին այդ ուղղությամբ»,- նշված է ԵԽ գրասենյակի տարածած հաղորդագրության մեջ:
Աշխատաժողովի օրակարգը ներառում էր նաև պանելային քննարկումներ և հարցուպատասխանի նիստեր:
