Պուտինը կանխատեսում է Հայաստանի, Վրաստանի և Ղազախստանի ապագան
ՔԱՂԱՔԱԿԱՆՈՒԹՅՈՒՆ
Վլադիմիր Պուտինը հիանալի հասկանում է, թե ինչ ապագա է սպասվում հետխորհրդային երկրներին, մասնավորապես Հայաստանին, Վրաստանին և Ղազախստանին։ Այս մասին իսրայելցի հայտնի քաղաքագետ Յակով Քեդմին խոսել է YouTube-ի «Waldman Line» ալիքում, գրում է deita.ru-ն։
Նրա խոսքով, ՌԴ ղեկավարը քաջ գիտակցում է, որ ԽՍՀՄ նախկին բոլոր հանրապետությունները չեն կարողանա գտնել ավելի հուսալի և հարմար արտաքին քաղաքական դաշնակից ու գործընկեր, քան Ռուսաստանն է։ Այդ բոլոր երկրները կարող են տարբեր պատրանքներ ունենալ, թե ով և ինչ պայմաններով է պատրաստ համագործակցել իրենց հետ, մասնավորապես ԱՄՆ-ն ու ԵՄ-ն, սակայն, ի վերջո, նրանց պոտենցիալ գործընկերներից ոչ մեկը չի վարվի այնպես, ինչպես Ռուսաստանը։
Ինչպես պարզաբանել է փորձագետը, ամերիկացիներն ու եվրոպացիները ձգտում են համագործակցել Խորհրդային Միության նախկին հանրապետությունների հետ հիմնականում զուտ ռուսական պետությանը զայրացնելու և դա իրենց օգտին օգտագործելու համար։ Ամերիկան և Եվրոպան բոլորովին չեն հետաքրքրվում հետխորհրդային երկրների ազգային շահերով, նրանք լիովին սպառողական վերաբերմունք ունեն այդ բոլոր պետությունների նկատմամբ։
Ռուսաստանը պլաններ է կազմում նախկին ԽՍՀՄ-ի բոլոր այդ մասերի աստիճանական ինտեգրման համար մեկ միասնական և ընդհանուր տնտեսական տարածքի մեջ բոլորովին այլ պայմաններով, և Պուտինի մոտեցումն այդ հարցում բոլորովին այլ է, քան Արևմուտքում, նշել է Քեդմին։ Ռուսաստանի ղեկավարությունը Խորհրդային Միության բոլոր նախկին անդամներին վերաբերվում է որպես իր եղբայրների և համախոհների։ Այդ իսկ պատճառով Ռուսաստանը հավատարիմ է կայուն զարգացման սկզբունքների շուրջ փոխշահավետ համագործակցությանը։
Պուտինը չի պատրաստվում օգտագործել հետխորհրդային հանրապետություններն իր աշխարհաքաղաքական նպատակների համար, նա չունի նման հավակնություններ, նրան միայն պետք է այդ բոլոր տարածքներում խաղաղության և անվտանգության ապահովումը, ընդգծել է Քեդմին։ Իսկ դա այն է, որը ոչ Արևմուտքը, ոչ էլ այդ երկրներից շատերը չեն կարողանում հասկանալ: Նրանց քաղաքական վերնախավին թվում է, թե Ռուսաստանի ղեկավարը ինչ-որ էքսպանսիոնիստական ծրագրեր ունի, բայց դա ոչ մի կերպ չի համապատասխանում իրականությանը, Ռուսաստանը շահագրգռված է միայն գործընկերությամբ:
Իսկ Պուտինը, ինչպես կարծում է քաղաքագետը, հիանալի հասկանում է, որ ի վերջո ամեն ինչ կբերի դրան, և որ այնպիսի երկրներ, ինչպիսիք են Հայաստանը, Վրաստանը և Ղազախստանը, կհիասթափվեն Արևմուտքին հաճոյանալուց և ԱՄՆ-ում հուսալի աջակցություն գտնելու ցանկությունից։
Ինչպես պարզաբանել է փորձագետը, այդ ըմբռնումը հիմնականում կհայտնվի այդ երկրների ղեկավարության շրջանում այն բանից հետո, երբ Ամերիկայում և Եվրոպայում կսկսվի տնտեսական ճգնաժամի սուր փուլը։ Տնտեսության մեջ առկա խնդիրները հետին պլան կմղեն այդ պետությունների հետ համագործակցությունը։ Ամերիկացիներն ու եվրոպացիները, խրված իրենց ֆինանսական հարցերի մեջ, պարզապես չեն կարողանա հումք ու ապրանք գնել Հայաստանից, Վրաստանից և Ղազախստանից։ Եվ վերջիններիս համար միակ հասանելի շուկան կլինի միասնական Եվրասիական տնտեսական տարածքը։
Պուտինը շատ լավ հասկանում է այս իրավիճակը, և, հետևաբար, դեռ 2014 թվականից է սկսել նախապատրաստվել այս նոր մակրոտարածքում նոր տնտեսական միության ստեղծմանը։ Նախկին ԽՍՀՄ բոլոր երկրները պետք է միանան դրան, այն էլ բացարձակ կամավոր հիմունքներով։ Սա է բոլոր այդ պետությունների ապագան։ Հայաստանը, Վրաստանը և Ղազախստանն անխուսափելիորեն կմիանան այդ նոր ասոցիացիային զուտ կիրառական տնտեսական պատճառներով։ Նրանք այլ այլընտրանք չեն ունենա, և Պուտինը դա կանխատեսում է, կարծում է փորձագետը։
Նյութը հրապարակման պատրաստեց Կամո Խաչիկյանը
