Ընդդիմության մարտավարությունը հունից հանում է Փաշինյանին
ՎԵՐԼՈՒԾՈՒԹՅՈՒՆՆԵՐ
Բագրատ արքեպիսկոպոս Գալստանյանի գլխավորած շարժման վերջին օրերի մարտավարությունը հունից հանում է գործող վարչախմբին։ Գալստանյանը, նշենք, մեծ բազմությամբ երթ է սկսում, առանց վերջնակետը հայտարարելու և հայտնվում պետական որևէ գերատեսչության առջև։ Մի քանի ժամ կազմալուծում դրա աշխատանքը, ինչպես նաև կոչեր հղում այդ գերատեսչությունների ղեկավարներին։
Օրեր առաջ նման մի այց տեղի ունեցել էր ԱԳՆ-ի դիմաց, երեկ էլ՝ քննչական կոմիտեի։ Թեև պետական գերատեսչություններին հանձնարարված է որևէ կերպ չարձագանքել և չհանդիպել Բագրատ Գալստանյանի հետ, նրանց փոխարեն դա անում են ոստիկանները, բայց ՔՊ մեր աղբյուրի փոխանցմամբ՝ այդ այցերից, ինչպես նաև հնչեցրած կարգախոսներից հետո, պետական այդ գերատեսչություններում իրավիճակ է փոխվում, պետծառայողները սկսել են մտահոգվել, հասկանում են, որ իրենք էլ պատասխանատվություն են կրելու փաշինյանկան վարչախմբի ապօրինությունների համար։
Շատերը բացեիբաց ներսում սկսել են խոսել Բագրատ արքեպիսկոպոս Գալստանյանի շարժմանն իրենց աջակցելու մասին։ Հատկապես ծանր են տարել ԱԳՆ-ում, երբ Սրբազանը հանձնարարել էր հանել ԱԳՆ բարձրաստիճան աշխատակիցների լուսանկարները և որպես թուրք-ադրբեջանական գործակալների տարածել դրանք։ Շատերը չափազանց վատ են ընդունել այս հանգամանքը՝ սեփական լուսանկարները տարածելու փաստը։
Ի վերջո թե՛ ԱԳՆ-ում, թե՛ այլ պետական գերատեսչություններում աշխատակիցների զգալի մասին թվում է, թե իրենք կկարողանային խուսափել պատասխանատվությունից՝ մնալով երկրորդ, երրորդ էշելոններում, բայց շարժման հաջողության համար հարկավոր է, որ հենց երկրորդ, երրորդ էշելոնների պաշտոնյաները լինեն հանրային պարսավանքի թիրախում և, ի վերջո գիտակցեն իրենց պատասխանատվությունը պետության և ժողովրդի առջև։
Մանե Հանիսյան
