Վարչախումբն ընդդեմ հայկական սփյուռքի

Նիկոլ Փաշինյանի վարչախումբն այժմ էլ շարունակում է թիրախավորել Սփյուռքին, այնտեղ կրկին դիմակայության օջախներ ստեղծել, իրար դեմ հանել ավանդական կուսակցություններին, նաև փորձել պառակտել Սփյուռքի կառույցներին, իր դեմ շարժումը թուլացնելու, ինչպես նաև տպավորություն ստեղծելու, թե հայ ժողովրդի մի մասն իր հետ է։

Երեկ Փաշինյանն ընդունել է ՍԴՀԿ կենտրոնական վարչության ատենապետ Համբիկ Սարաֆյանին։ Վերջինս հայտարարել է, թե ՍԴՀԿ-ն կիսում է Հայաստանի կառավարության խաղաղության օրակարգը, մարտահրավերները հաղթահարելուն միտված քայլերը, ինչպես նաև վարվող արտաքին քաղաքականությունը։

Սարաֆյանին նաև այս օրերին քարշ են տալիս տարբեր իշխանական լրատվամիջոցների եթերներով, երեկ էլ Հանրային հեռուստաընկերության եթերում քննադատել է Բագրատ Սրբազանի գլխավորած շարժումը՝ հայտարարելով, թե իրենք չեն կիսում այդ շարժման խոսույթը։

Ըստ էության, գործող վարչախմբի նպատակը մեկն է, ոչ միայն Սփյուռքում, այլ նաև Հայաստանում ցույց տալ, թե իրենց դեմ շարժումը լիակատար չէ և չի ընդգրկում ժողովրդի լայն զանգվածները, ընդհակառակը, որոշակի աջակցություն ունեն Սփյուռքում։

Իրականում այդպես չէ, ընդամենը սփյուռքյան կառույցների մի փոքր հատված, այն էլ սեփական նեղ անձնական շահերի համար, աջակցում է Նիկոլ Փաշինյանին՝ դրա դիմաց որոշ արտոնություններ ստանալով, մի մասն էլ պայմանավորվել է Փաշինյանի հետ տեղերում փորձում են թուլացնել ավանդական կուսակցությունների՝ հատկապես ՀՅԴ ազդեցությունը, սեփական ճղճիմ նպատակների, Սփյուռքի գծով հանձնակատարներ նշանակվելու և Հայաստանի պետական բյուջեից ֆինանսավորվելու նպատակով։

Փաշինյանն այդ առումով կարծես խնդիր չունի, պատրաստ է գործակցել յուրաքանչյուրի հետ, միայն թե սեփական շահերն առաջ մղվի, ինչպես նաև թուլացնի Սփյուռքը, իսկ Սփյուռքի թուլացման թիվ 1 շահառուներն ինչպես հայտնի է, Թուրքիան և Ադրբեջանն են։

Շահանե Ազիզյան