Հայաստանի և Ադրբեջանի իշխանություններն ավարտում են սահմանի սահմանազատումը կարևոր տարածքում
ՔԱՂԱՔԱԿԱՆՈՒԹՅՈՒՆ
Ադրբեջանի նախագահ Իլհամ Ալիևը Լատվիայի Սեյմի նախագահ Դայգա Միերինայի հետ հանդիպման ժամանակ ասել է, որ Բաքվի և Երևանի միջև արդեն իսկ դրական պայմանավորվածություններ են ձեռք բերվել ընդհանուր սահմանի սահմանազատման վերաբերյալ, գրում է ng.ru-ն։ Քիչ անց նրան զանգահարել է Թուրքիայի ղեկավար Ռեջեփ Թայիփ Էրդողանը, ով գոհունակություն է հայտնել «Ադրբեջանի և Հայաստանի միջև խաղաղ գործընթացի դրական ուղղությամբ առաջընթացի կապակցությամբ»։ Իր հերթին, Հայաստանի իշխանությունները հայտարարել են, որ ավարտում են սահմանագծումը Կիրանց գյուղի տարածքում։ Այդ կապակցությամբ իրավապահ մարմինները ժամանակավորապես արգելափակել են մուտքը տարածք զանգվածային բողոքի ցույցերից խուսափելու համար: Եվ ինչպես պարզվել է նախազգուշական միջոցներն իզուր չեն եղել։
Սահմանների սահմանազատման հակառակորդները փորձում են ապացուցել, որ Փաշինյանի իշխանությունը ոչ թե խորհրդային քարտեզներով է վերադարձնում Ադրբեջանին իր տարածքը, այլ հանձնում է հայկական հողերը։ Այդ վարկածի օգտին փաստարկներից մեկն էլ այն պնդումն է, որ նախկինում ադրբեջանական տարածքում գտնվող տների բնակիչները գրանցման փաստաթղթեր են ստացել Հայաստանում։ Սակայն հանրապետության արդարադատության նախարարությունից պատասխանել են, որ փաստաթղթերը կազմվել են ոչ հավաստի տվյալների հիման վրա։ Չնայած դրան, իշխանությունները խոստանում են տուժածներին փոխհատուցել տեղափոխման ծախսերը։
«Առայժմ մենք տեսնում ենք, որ բողոքի ակցիաներն անկում են ապրում, և ընդդիմությունը հնարավորություններ է փնտրում իր ելույթներին նոր թափ հաղորդելու համար։ Բայց առայժմ դա չի աշխատում։ Նախ չկան համապատասխան նոր տեղեկատվական առիթներ։ Երկրորդ հերթին Փաշինյանի ընդդիմախոսները չեն կարողացել հստակ քաղաքական օրակարգ ձևակերպել: Բողոքը Կիրանցից տարածեցին մինչև Երևան, բայց չձևակերպեցին իրենց հետագա անելիքները։ Մասնավորապես, հնարավոր չեղավ իրականացնել Փաշինյանի իմփիչմենթի գաղափարը, քանի որ ընդդիմությունը նույնիսկ ձայներ չունի այդ ընթացակարգը սկսելու համար»,- ng.ru-ի հետ զրույցում ասել է հայ քաղաքական վերլուծաբան Արշալույս Մղդեսյանը։ Փորձագետի կարծիքով շատ բան կախված կլինի հայ-ադրբեջանական սահմանի սահմանազատման շարունակությունից։ Առայժմ դա տեղի է ունենում խորհրդային քարտեզներին լիովին համապատասխան, սակայն կա կարծիք, որ դա այդպես է այն պատճառով, որ Տավուշի մարզում Հայաստանը պետք է տարածքներ հանձնի, այլ ոչ թե վերցնի Ադրբեջանից։ Ինչ վերաբերում է, օրինակ, Սյունիքի մարզին, ապա Բաքուն այդ ժամանակ կարող է այլ դիրքորոշում ունենալ, քանի որ այնտեղ ստիպված է լինելու նահանջել։
«Սահմանների սահմանազատումը սկսելուց առաջ անհրաժեշտ էր խաղաղության պայմանագիր կնքել։ Կարող է ստացվել, որ Ալիևը Փաշինյանին հնարավորություն է տվել փրկել դեմքը, իսկ դրա դիմաց նա տալիս է չորս գյուղերի տարածքը։ Թերևս այդ ամենով էլ ամեն ինչ կավարտվի: Հակառակ դեպքում անհասկանալի է, թե ինչո՞ւ են որոշել սկսել սահմանը գծել կոնկրետ այդ վայրում։ Ինչ վերաբերում է այն տարածքներին, որոնք Ադրբեջանը պետք է վերադարձնի Հայաստանին, դրանք կան անգամ Տավուշի մարզում, բայց այդ մասին առայժմ բոլորը լռում են»,- ng.ru-ի հետ զրույցում ասել է քաղաքագետ Տիգրան Քոչարյանը։
Մինչդեռ Հայաստանի խորհրդարանի նախագահ Ալեն Սիմոնյանն ասել է, որ 2026 թվականի խորհրդարանական ընտրություններում իշխող «Քաղաքացիական պայմանագիր» կուսակցությունը ջախջախիչ հաղթանակ է տանելու Կիրանցում և սահմանամերձ այլ գյուղերում։ Նրա խոսքով, այժմ ընդդիմությունը «դրդում և խաղում է մարդկանց էմոցիաների վրա», բայց ոչ ոք չպետք է կասկածի, որ Հայաստանը որևէ մեկին չի վնասի և անօթևան չի թողնի։
Նյութը հրապարակման պատրաստեց Կամո Խաչիկյանը
