Թուրքիան իր բաժինն է ուզում հարավկովկասյան պատառից

Թուրքիայի արտգործնախարար Հաքան Ֆիդանը գրեթե հաստատել է, որ Հայաստանին սահմանազատում և սահմանագծում պարտադրելու ջանքերի մեջ Թուրքիան իր սեփական մասնակցությունն ունի։

Թուրքական պետությունների խորհրդարանական վեհաժողովի ազգային պաշտպանության հանձնաժողովների նախագահների առաջին հանդիպմանը Ֆիդանն Անկարայում հայտարարել է, թե Թուրքիան լիովին աջակցում է Ադրբեջանին։ Մեկնաբանելով 4 հայկական գյուղերի հանձնումը Բաքվին և անդրադառնալով Հարավային Կովկասում տիրող իրավիճակին՝ Ֆիդանն ասել է, թե Ադրբեջանը ճանապարհ հարթեց տարածաշրջանում կայուն խաղաղության համար՝ վերջ դնելով Ղարաբաղի օկուպացմանը, որը տևեց գրեթե երեք տասնամյակ։

Ֆիդանը դրական քայլ է համարել Հայաստանի կողմից «օկուպացված» 4 գյուղերի վերադարձն Ադրբեջանին, ինչպես նաև Ալմա-Աթայում ԱԳ նախարարաների հանդիպմանը։ Նա ընդգծել է, որ Թուրքիան լիովին աջակցում է Ադրբեջանին այս գործընթացում։

Ըստ էության, Թուրքիան, արտգործնախարարի բերանով, պարզորոշ հասկացնում է, որ հենց ինքն է կանգնած այս ամենի ետևում, ավելին, Նիկոլ Փաշինյանն ու իր իշխանության ներկայացուցիչները բոլորովին չեն հերքել, որ Թուրքիայի և Ադրբեջանի պահանջով են իրականացնում այսպես կոչված սահմանագծումը, իրականում՝ Հայաստանից կարևոր ռազմավարական բարձրունքներ հակառակորդին զիջելը, Հայաստանի ինքնիշխանությանը վնասելը և սպասվող նոր պատերազմում Հայաստանի դիրքերի թուլացումը։

Ի վերջո, նոր արհավիրքի սպասման մեջ, անհրաժեշտ է օր առաջ ազատվել փաշինյանական վարչախմբից, այլապես հետևանքները չափազանց ծանր է լինելու մեր երկրի համար։

Մարիամ Հայրապետյան