Ալիևը Բլինքենին ուղարկել է Ասանժի մոտ. Բաքուն փորձում է թա՞նկ վաճառել իրեն
ՔԱՂԱՔԱԿԱՆՈՒԹՅՈՒՆ
Բրյուսելում Նիկոլ Փաշինյանի, Եվրահանձնաժողովի ղեկավար Ուրսուլա ֆոն դեր Լյաենի և ԱՄՆ պետքարտուղար Անտոնի Բլինяենի հանդիպումը տեսանելի արդյունք չի տվել։ Արևմտյան գործընկերներն ավանդաբար սահմանափակվել են մտադրությունների հայտարարություններով, մինչդեռ Երևանը հույսը դնում էր առնվազն անվտանգության երաշխիքների խոստումների վրա, գրում է Svpressa.ru-ն:
Ադրբեջանի նախագահ Իլհամ Ալիևը ավելի վաղ նշել էր, որ ԱՄՆ-ԵՄ-Հայաստան եռակողմ հանդիպման ոչ թափանցիկ նախապատրաստումը, միջոցառման ոչ ներառական լինելը և այն չհետաձգելը, չնայած Բաքվի արդարացի փաստարկներին, կհանգեցնի ոչ թե խաղաղության ու համագործակցության Հարավային Կովկասում, այլ բաժանարար գծերի ի հայտ գալուն և, ի վերջո, լարվածության աճի:
Ամերիկյան կողմի նախաձեռնությամբ բրյուսելյան հանդիպումից առաջ կայացած հեռախոսազրույցի ընթացքում Ալիևը անհիմն է անվանել Արևմուտքում շրջանառվող մեղադրանքները, թե Բաքուն մտադիր է հարձակվել Հայաստանի վրա, և Բլինքենին ասել է, որ Ադրբեջանի ներքին գործերին մարդու իրավունքների պաշտպանության պատրվակով միջամտությունը անթույլատրելի է:
Ալիևն անդրադարձել է նաև հայտնի լրագրող Ջուլիան Ասանժին, ով երկար ժամանակ ֆիզիկական և հոգեկան խոշտանգումների է ենթարկվել հենց իր լրագրողական գործունեության համար։ Հետաքրքիր է, ինչո՞ւ է Ալիևն այդքան լկտիացել հենց ԱՄՆ պետքարտուղարի նկատմամբ։ Թե՞ ԱՄՆ-ն արժանի է դրան։
«Իլհամ Ալիևը հավանաբար նկատի է ունեցել բավական լայն թեմաներ, որոնց շուրջ Վաշինգտոնը և առանձին ամերիկացի քաղաքական գործիչներ քննադատել են Բաքվին,- ասել է Քաղաքական և տնտեսական հաղորդակցությունների գործակալության վերլուծական նախագծերի տնօրեն Միխայիլ Նեյժմակովը:- Կարելի է հիշել Ադրբեջանում նախագահական քարոզարշավից հետո Բաքվում ԱՄՆ դեսպանատան հայտարարությունն այն մասին, որ Վաշինգտոնը «կիսում է դիտորդական առաքելության դիտարկումներն ու մտահոգությունները» ընտրությունների վերաբերյալ։ Բացի այդ, ԱՄՆ Պետդեպարտամենտի կողմից Ադրբեջանը կրոնական ազատությունների ոտնահարումների պատճառով ընդգրկվել է հատուկ հսկողության ենթակա երկրների ցանկում»։
«svpressa.ru».- Ալիևը նշել է, որ Արևմուտքում հնչած մեղադրանքները, թե Ադրբեջանը մտադիր է հարձակվել Հայաստանի վրա, լիովին անհիմն են։ Ո՞վ է Արևմուտքում տարածում այդ լուրերը և ի՞նչ նպատակով։
- Ավելի շուտ, Արևմուտքում շատերը ենթադրում են, որ ավելի ուժեղ դիրք ունեցող կողմը կարող է օգտվել իրավիճակից։ Մյուս կողմից, Նիկոլ Փաշինյանը ևս պարբերաբար ակնարկում է, որ Բաքուն կարող է ռազմական ճնշում գործադրել Երևանի վրա, և ուղղակիորեն նշում է տարածաշրջանում հնարավոր զինված սրացման մասին։
«svpressa.ru».- Ի՞նչ կարող է անել Բաքուն Արևմուտքի դեմ: Արդյո՞ք Արևմուտքի քաղաքականությունը տարածաշրջանում ուղղված է Ռուսաստանի դեմ։ Թե՞ Բաքվի դեմ էլ է: Ո՞վ է Բաքվին քաջություն տալիս՝ Ռուսաստա՞նը, Թուրքիա՞ն, թե՞ երկուսն էլ միասին։
- Ավելի շուտ, Միացյալ Նահանգները, ինչպես հաճախ է պատահում, գործում է «ճոճանակի սկզբունքով»՝ փորձելով հերթով դրական ազդակներ ուղարկել Երևան և Բաքու։ Ալիևը, հավանաբար, ակնկալում է, որ երկրի լոգիստիկ նշանակությունը և նրա նավթագազային պաշարները այնպիսի գործոններ են, որոնք ամերիկացիներին կստիպեն հաշվի առնել Բաքվի դիրքորոշումը։ Բացի այդ, նրանք կարող են ելնել այն հանգամանքից, որ շուտով, ԱՄՆ-ում նախագահական քարոզարշավի գագաթնակետին, Վաշինգտոնի ուշադրությունը Հարավային Կովկասի նկատմամբ կարող է նվազել, ինչը նույնպես որոշակի մանևրելու տեղ կապահովի: Հիշենք, որ նմանատիպ ֆոնի վրա էլ 2020 թվականի աշնանը տեղի ունեցավ Ղարաբաղյան երկրորդ պատերազմը։
«svpressa.ru».- Անդրկովկասը Ռուսաստանի, Թուրքիայի և Իրանի ազդեցության գոտին է։ Ի՞նչ է մնում անել մյուս խաղացողներին՝ ԱՄՆ-ին, Բրիտանիային, Ֆրանսիային: Ի՞նչ են նրանք իրականում նախապատրաստում: Նրանց նպատակը Ռուսաստանի՞ն, թե՞ Իրանին դուրս բերելն է տարածաշրջանից։ Կամ երկուսի՞ն էլ, բայց այդ դեպքում չե՞ն վախենում Թուրքիայի հզորացումից։
- Այո, արևմտյան խաղացողները, անշուշտ, կցանկանային թուլացնել Ռուսաստանը Հարավային Կովկասում։ Թուրքիայի չափազանց նկատելի ուժեղացումը նույնպես նրանց շահերից չի բխում, բայց, հավանաբար, նրանք պատրաստ են աչք փակել Անկարայի դիրքերի ժամանակավոր ամրապնդման վրա՝ հավատալով, որ անհրաժեշտության դեպքում կկարողանան ճնշում գործադրել թուրքերի վրա:
«Նախագահ Իլհամ Ալիևն իրեն հաղթողի և տարածաշրջանային գլխավոր խաղացողի նման է պահում՝ հասկացնելով, որ կարիք չկա իրեն սովորեցնել, թե ինչպես ապրել,- ասել է «APN Հյուսիս-Արևմուտք-ի խմբագիր Անդրեյ Դմիտրիևը, - արդյունքում՝ Էնթոնի Բլինկենը, ով փորձել է պաշտպանել մի քանի ձերբակալված ընդդիմադիր արևմտամետ լրագրողների, խիստ նկատողություն է ստացել Ջուլիան Ասանժի հետապնդումների կապակցությամբ։ Եվ այստեղ, պետք է ասել, որ Ալիևը միանգամայն իրավացի է։ Նա ավելի քան վստահորեն հաղթեց ղարաբաղյան երկու պատերազմներում և շարունակում է ճնշում գործադրել Հայաստանի վրա Նախիջևանի միջանցքի հարցերում, ինչպես և առաջ մղել նոր տարածքներ ստանալու հարցերը: Նրա թիկունքին Ռեջեփ եղբայրն է: Ռուսաստանն իրավացիորեն զայրացած է Նիկոլ Փաշինյանի վրա, որը հետամուտ է երբեմնի դաշնակցային հարաբերությունների խաթարմանը, իսկ ԱՄՆ-ն ու Եվրոպան ոչինչ չեն կարող անել անգամ Հայաստան Ադրբեջանի ներխուժման դեպքում։ Նրանց պետք է մեկ օր կանգնել Ուկրաինայի կողքին և մեկ գիշեր էլ անցկացնել Իսրայելի հետ: Ուստի Ալիևի ձեռքին են հաղթաթղթերը, և նա կարող է ապահով կերպով Բլինքենին ուղարկել ուր ուզում է»։
Նյութը հրապարակման պատրաստեց Կամո Խաչիկյանը
