Ավարտվել է Մհեր Գրիգորյանի և Տավուշի բնակիչների հանդիպումը
ՔԱՂԱՔԱԿԱՆՈՒԹՅՈՒՆ
Ավարտվեց Տավուշի չորս համայնքների ղեկավարների ու մարզային իշխանությունների հանդիպումը փոխվարչապետ Մհեր Գրիգորյանի հետ:
Այս մասին հայտնում է Ազատությունը։
Տավուշի համայնքապետերին դուրս բերեցին և տարան կառավարական մեքենաները: Թե կոնկրետ ինչ է քննարկվել հանդիպմանն, այս պահին հայտնի չէ:
Ավելի վաղ հաղորդել էինք որ արդեն 2 ժամ է՝ մեկնարկել էր Գրիգորյանի հանդիպումը Տավուշի մարզի մի շարք վարչական շրջանների ներկայացուցիչների հետ։
Այս հանդիպման պահանջը շաբաթ երեկոյան էր առաջացել։ Բնակիչները փակել էին ճանապարհը, անվտանգության երաշխիքներ պահանջել իշխանություններից։
Նրանք Տավուշի մարզում խոստում ստացան սահմանազատման հարցերի հանձնաժողովի նախագահ Մհեր Գրիգորյանի հետ հանդիպելու վերաբերյալ։ Սակայն, հանդիպումը ոչ թե Տավուշում է, այլ Երևանում՝ կառավարության շենքում։ Առայժմ հստակ չէ, թե համայնքապետերն արդյոք պահանջների փաթեթով են եկել, կամ ինչ առաջարկներ ունեն։
Հանդիպմանը ենթադրաբար մասնակցում են նաև Կիրանց, Բերքաբեր, Ոսկեպար գյուղերից երեք բնակիչներ։ Այսօր առավոտյան վարչապետ Փաշինյանը երկու աշխատանքային խմբեր ստեղծելու մասին որոշում է ստորագրել, դրանցից մեկը հենց մարզային ու տեղական իշխանության ներկայացուցիչներով է համալրված։ Այսօր կարծես թե հենց այդ աշխատանքային խմբի և սահմանազատման հանձնաժողովի ղեկավարի առաջին հանդիպումն է։ Երկրորդ աշխատանքային խմբում հիմնականում գերատեսչությունների ներկայացուցիչներ են, նաև գեոդեզիստներ ու քարտեզագիրներ։
