Ապրիլի 5-ի Բրյուսելի հանդիպումը կսրի Կովկասում իրավիճակը. Ալիև

ԱՄՆ պետքարտուղար Էնթոնի Բլինքենը ապրիլի 3-ին զանգահարել է Ադրբեջանի նախագահ Իլհամ Ալիևին։ Զրույցի թեման ապրիլի 5-ին նախատեսված ԱՄՆ-ի, ԵՄ-ի և Հայաստանի եռակողմ հանդիպումն էր։ Դրա մասին հայտնել են ադրբեջանական լրատվամիջոցները։

Ալիևը, մասնավորապես, ասել է, որ ըստ «իր ունեցած տեղեկությունների՝ եռակողմ հանդիպման նախապատրաստման գործընթացում քննարկվել են նաև այնպիսի հարցեր, ինչպիսին են Հայաստանին ռազմական օգնությունը և համատեղ զորավարժությունները, Ադրբեջանին սահմանակից տարածքներում ռազմական ենթակառուցվածքների ստեղծումը, Եվրոպական Միության Խաղաղության հիմնադրամի միջոցով և ԱՄՆ բյուջեի հաշվին Հայաստանին զինելը»։

Ալիևը հայտարարել է, որ «հակաադրբեջանական ուղղվածություն ունեցող նման քայլերը, որոնց թվում՝ Հայաստանին Ֆրանսիայի կողմից զինելու քաղաքականությունը, մղում են սպառազինությունների մրցավազքի և տարածաշրջանում հանգեցնելու են սադրանքների»։

Զրույցի ընթացքում քննարկվել են Հայաստանի և Ադրբեջանի միջև խաղաղ բանակցությունները։

Իլհամ Ալիևն ասել է, որ Բեռլինում արտգործնախարարների միջև խաղաղության պայմանագրի տեքստի վերաբերյալ բանակցություններն օգտակար էին գործընթացի առաջմղման առումով, և բանակցություններն արագացնելու անհրաժեշտություն կա։

«Արեւմուտքում հնչած մեղադրանքները, թե Ադրբեջանը մտադիր է հարձակվել Հայաստանի վրա, լիովին անհիմն են»,- պնդել է Ադրբեջանի նախագահը:

Իլհամ Ալիևը հայտարարել է, որ «Փարիզում ապրիլի 2-ին Էնթոնի Բլինքենի հետ անցկացված մամուլի ասուլիսում Ֆրանսիայի արտգործնախարարը սուտ է ասել՝ Ադրբեջանին մեղադրելով Հայաստանի տարածքային ամբողջականությունը չճանաչելու և Հայաստանի համար վտանգի աղբյուր լինելու մեջ։