Ապրիլյան պատերազմում երկու ոտքից զրկված Դավիթ Գրիգորյանը արդեն քայլում է
ՊԱՏՄՈՒԹՅԱՆ ԱՅՍ ՕՐԸ
Ապրիլյան պատերազմում երկու ոտքից զրկված Դավիթ Գրիգորյանի քայլելու լուրն ավետում է նրա բժիշկը՝ Մկրտիչ Գինոսյանը:
Բժիշկը զինվորի հետ լուսանկարը տեղադրել է ֆեյսբուքյան էջում. «Դավիթ Գրիգորյան (ժպտացող տղան)»:
Զինվորը «ժպտացող» մականունը ստացավ սոցցանցերի օգտատերերի կողմից, հոսպիտալում արված գրեթե բոլոր լուսանկարներում նա ժպտում էր:
«Մեկ էլ պայթուն լսվեց: Տեսա՝ ոտքս չկա: Հանեցի համազգեստիս գոտին ու կապեցի, որ չարնահոսեմ: Նոր էի ավարտել կապելը, նորից պայթյուն լսվեց, տեսա՝ մյուս ոտքս կտրվեց: Զինվորական սապոգիս քուղը հանեցի ու մյուս ոտքս կապեցի: Պառկած սպասում էի, որ ընկերներս օգնության գան, գլխիս տակ ինչ-որ կոշտ բան զգացի, նայեցի- տեսա ական է: Ձեռքով փորելով էդ ականը հանեցի գլխիս տակից….Ազգային հերոս պաշտպանության նախարար Սեյրան Օհանյանի այցելությունը ինձ շատ ոգևորեց: Նախարարն ասաց՝ ծունկ ունես, ուրեմն՝ ոտք ունես:
Մեր նախարարին խնդրեցի հնարավորություն տալ շարունակելու ծառայություն: Շատ շնորհակալ եմ, որ ընդառաջեց, խոստացավ իմ ծննդավայր Նոյեմբերյան զորամասում ծառայությունս շարունակելու հնարավորություն տալ»,-«Հայզինվոր»-ին ասել էր Դավիթը:
