Ուկրաինական ճակատը լցվել է մուլյաժային զինտեխնիկայով. ինչու՞ է աճել կեղծ զենքի պահանջարկը
ՔԱՂԱՔԱԿԱՆՈՒԹՅՈՒՆ
Զինտեխնիկայի մուլյաժներ, այսինքն կեղծ թիրախներ, ստեղծելու համար օգտագործվում են պլաստիկ խողովակներ, տախտակներ, փրփրաբլոկներ, հին անվադողեր, մետաղական թիթեղներ և այլն, իսկ հակառակորդը կուլ է տալիս խայծը և թանկարժեք զինամթերք ծախսում դրանց ոչնչացնելու համար, գրում է focus.ua։
Ուկրաինայի շատ քաղաքներում են ստեղծվում հրթիռային և հրետանային կայանների իրական չափերի մոդելներ, որոնք նախատեսված են Ռուսաստանին ստիպելու զինամթերք վատնել կեղծ թիրախները ոչնչացնելու համար: Մարդիկ ձգտում են մոդելները դարձնել հնարավորինս «իրատեսական և էժան», օգտագործվում է այն ամենը, ինչ ձեռքի տակ է ընկնում: Մուլյաժները տեղակայված են ողջ ճակատային գծի երկայնքով:
Օրինակ 32-ամյա Միխայիլ Ռոմանի թիմը, ով նախկինում ապրել է Վինոգրադովում, զենքի մոդելներ է արտադրում նրբատախտակից, մետաղից և պլաստմասե ջրահեռացման խողովակներից։ Անցած տարվա ընթացքում նրանք ստեղծել են Stugna հակատանկային կառավարվող հրթիռների ավելի քան 200 և 2 D-20 հաուբիցների մակետներ, որոնք տեղակայվել են Ուկրաինայի ճակատային գծի երկայնքով։
Առաջին իմիտացիոն հրթիռային կայանի մշակումը տևել է երկու ամիս և արժեցել է մոտ 3000-4000 գրիվնա (60-80 ֆունտ ստեռլինգ): Ռոմանը այն ժամանակից ի վեր պարզեցրել է արտադրության գործընթացը և նվազեցրել դրա գինը մինչև 1000 գրիվնայի, որը ավելի էժան է քան ռուսական հրետանու 790 ֆունտ ստեռլինգ արժեցող մեկ արկը: Եվ ռուսները «խայծը վերցնում են» և թանկարժեք զինամթերք ծախսում մուլյաժները ոչնչացնելու համար։ Ռոմանի թիմի հաջողությունը չափվում է ոչնչացված մուլյաժների քանակով։ «Երբ դրանք խփվում են, դա ինձ ստիպում է ավելին ստեղծել», - ասել է նա:
Դրանք նաև գործնական առավելություն ունեն՝ օգնում են ուղղորդել ուկրաինական հարձակումները։
«Երբ ռուս զինվորները ոչնչացնեն այդ մոդելները, մեր զինվորականները կկարողանան տեսնել նրանց դիրքերը և հարձակվել»,- ասել է նա։
Ուկրաինայում մակետների արտադրության աճը տեղի է ունենում առաջնագծում արկերի պակասի մասին հաղորդագրությունների ֆոնին: Ուկրաինայի Զինված ուժերի գլխավոր հրամանատար Ալեքսանդր Սիրսկին իր նոր հարցազրույցում խոստովանել է, որ Ռուսաստանի զինված ուժերը, որոնք կռվում են Ուկրաինայի արևելքում, ունեն վեց անգամ ավելի շատ զինամթերք, քան Պաշտպանության ուժերը։
Նա նաև ասել է, որ ուկրաինական զորքերը սովորում են հարմարվել և կռվել սահմանափակ զինամթերքով և զինվորներով, սակայն 500,000 ավելի զորք հավաքագրելու պլանները ձախողվել են:
«Այս մոդելների հիմնական գաղափարը հակառակորդին հյուծելն ու նրա դիրքերը տեսնելն է: Մեզ իրական զենք է պետք, քանի որ պատերազմը կարող ենք հաղթել միայն իրական զենքով»,- ասում է Ռոմանը:
Վերջին շաբաթների ընթացքում Ռոմանի թիմը պատվերներ է ստացել մշակել ավելի բարդ մոդելներ, մասնավորապես Patriot հրթիռային համակարգի նախատիպեր։ Դրա իրականն արժեքը մոտ 1 միլիարդ դոլար է, գումարած ևս 1 միլիարդ դոլար կամ մոտավորապես այդքան ծրագրային ապահովում և հրթիռներ:
Կեղծը կարժենա մոտ 10 հազար դոլար, իսկ ռուսական«Իսկանդեր» հրթիռը, որով կարելի է ոչնչացնել այն արժե 3 միլիոն դոլար։
«Կեղծ Patriot- ը կտեղադրվի առաջնագծից շատ հեռու, որպեսզի միայն Իսկանդերը կարողանա տեսնել և ոչնչացնել այն», - ասել է Ռոմանը:
Ուկրաինայի պատերազմում ռազմական խաբեությունը հասել է նոր բարձունքների՝ փչովի տանկեր, փայտե HIMARS-ներ և այլն:
Անցած տարվա ընթացքում պարոն Ռոմանի նախագծերը մի տեսակ կեղծ սպառազինությունների մրցավազք են առաջացրել, որի ընթացքում որքան լավ են ռուսական զորքերը հայտնաբերում նրա պատճենները, այնքան ավելի առաջադեմ են նրա նախագծերը:
Նյութը հրապարակման պատրաստեց Կամո Խաչիկյանը
