ՆԱՏՕ-ն հավատարիմ է Ադրբեջանի, Հայաստանի և Վրաստանի հետ գործընկերությանը. Ստոլտենբերգ
ՔԱՂԱՔԱԿԱՆՈՒԹՅՈՒՆ
ՆԱՏՕ-ի գլխավոր քարտուղար Յենս Ստոլտենբերգը նշել է, որ Հյուսիսատլանտյան դաշինքը հավատարիմ է Մոլդովայի, Ադրբեջանի, Հայաստանի և Վրաստանի հետ գործընկերային հարաբերություններին։ Այս մասին հաղորդում է «Ինտերֆաքսը»։
«ՆԱՏՕ-ն և Մոլդովայի Հանրապետությունը երկարաժամկետ հարաբերություններ ունեն՝ հիմնված քաղաքական երկխոսության և գործնական համագործակցության վրա», - ասվում է Գլխավոր քարտուղարի 2023 թվականի զեկույցում, որը նա ներկայացրել է լրատվամիջոցներին հինգշաբթի օրը Բրյուսելում ՆԱՏՕ-ի կենտրոնակայանում:
Փաստաթղթում, մասնավորապես, նշվում է, որ ՆԱՏՕ-ի գործնական աջակցությունը կենտրոնացած է Մոլդովայի պաշտպանության և անվտանգության ոլորտի ամրապնդման վրա՝ երկրի բանակի բարեփոխման և արդիականացման ու դրա հետ կապված կարողությունների մեծացման միջոցով:
Փաստաթղթում առանձին բաժին է հատկացված Հարավային Կովկասի երեք պետություններին՝ Ադրբեջանին, Հայաստանին և Վրաստանին։
«ՆԱՏՕ-ն աջակցություն է հայտնել այս երեք գործընկերներից յուրաքանչյուրի տարածքային ամբողջականությանը, քաղաքական անկախությանը և ինքնիշխանությանը: ՆԱՏՕ-ն Հայաստանին և Ադրբեջանին կոչ է արել կառուցողական կերպով փոխգործակցել տարբեր ձևաչափերում և ընդգծել է հումանիտար խնդիրների լուծման կարևորությունը։ ՆԱՏՕ-ն նաև ձգտում է ավելի ամուր գործընկերային հարաբերություններ պահպանել Հայաստանի և Ադրբեջանի հետ՝ անհատական գործընկերության ծրագրերի մշակման միջոցով»,- ասված է գլխավոր քարտուղարի զեկույցում։
Փաստաթղթում Վրաստանը նշվում է որպես «ՆԱՏՕ-ի ամենամոտ գործընկերներից մեկը», որը ձգտում է դառնալ դաշինքի անդամ։
