Թուրքիայի պաշտպանության նախարարը ժամանել է Իրաքի հետ սահման՝ լայնածավալ գործողության մասին լուրերի ֆոնին

Թուրքիայի ազգային պաշտպանության նախարար Յաշար Գյուլերը ժամանել է Իրաքի հետ սահման՝ սպասվող ցամաքային գործողության մասին լուրերի ֆոնին և հրամանատարությանը հանձնարարականներ է տվել տեղում իրավիճակի վերաբերյալ, հաղորդում է TRT Haber պետական ​​հեռուստաալիքը։

«Ազգային պաշտպանության նախարար Յաշար Գյուլերը փոխնախարար Շուայ Ալփայի հետ այցելել է Շըրնաք։ Շերաֆեթթին Էլչի օդանավակայանում հանդիպումից հետո նախարար Յաշար Գյուլերը ուղղաթիռով գնացել է 23-րդ հետևակային դիվիզիայի հրամանատարություն, որտեղ ստուգումներ է անցկացրել։

Նախարար Յաշար Գյուլերը, տեղեկություններ ստանալով հյուսիսային Իրաքում գործողությունների ընթացքում վերջին իրավիճակի մասին, հանձնարարականներ է տվել այս տարածաշրջանում իրականացվող աշխատանքների վերաբերյալ»,- հաղորդում է պետական ​​հեռուստաալիքը։

Թուրքիայի զինված ուժերն ակնկալում են լայնածավալ ցամաքային գործողություններ իրականացնել Հյուսիսային Իրաքում Քրդստանի բանվորական կուսակցության (PKK) զինյալների դեմ, որոնք արգելված են երկրում, այդ մասին պայմանավորվածություն է ձեռք բերվել Բաղդադի վարչակազմի հետ, ավելի վաղ հայտնել էր Hürriyet թերթը։ Միաժամանակ, ինքը՝ Գյուլերը, պարբերականին տված հարցազրույցում հայտարարել է, որ Թուրքիան ոչ մեկից թույլտվություն չի խնդրի այս գործողության համար։