ԵՄ-ն աջակցում է Հայաստանի և Ադրբեջանի միջև խաղաղությանը՝ տարածքային ամբողջականության սկզբունքի հիման վրա
ՔԱՂԱՔԱԿԱՆՈՒԹՅՈՒՆ
ՄԱԿ-ի Մարդու իրավունքների խորհրդի 55-րդ նիստում Եվրամիությունը հանդես է եկել հայտարարությամբ, որում անդրադարձել է նաև Հայաստանին և Արցախին, փոխանցում է «Լուրերը»։
«ԵՄ-ն ընդգծում է իր շարունակական աջակցությունը Հայաստանի և Ադրբեջանի միջև կայուն և տևական խաղաղության խթանմանը՝ հիմնված ինքնիշխանության, սահմանների անխախտելիության և տարածքային ամբողջականության ճանաչման սկզբունքների վրա՝ համաձայն 1991 թ. Ալմա-Աթայի հռչակագրին կողմերի հավատարմության:
ԵՄ-ն շարունակում է լիովին հավատարիմ մնալ այս ուղղությամբ և բրյուսելյան կարգավորման գործընթացի շրջանակներում գործադրվող ջանքերին աջակցելուն և կոչ է անում կողմերին գործել բարեխղճորեն:
ԵՄ-ն հավասարապես կարևորում է Ղարաբաղի հայության իրավունքների և անվտանգության ապահովումը, ինչպես նաև փախստականների և տեղահանված անձանց կամավոր, անվտանգ, արժանապատիվ և կայուն վերադարձի համար պայմանների ստեղծումը Լեռնային Ղարաբաղում, մասնավորապես՝ իրենց տներում արժանապատիվ ապրելու իրավունքը՝ առանց ահաբեկման կամ խտրականության:
Բացի դրանից՝ տեղի բնակչության մշակութային ժառանգությունն ու գույքային իրավունքները պետք է արդյունավետ կերպով պաշտպանվեն և երաշխավորվեն: Միջազգային դատարանի վճիռների ամբողջական կատարումն առաջնային նշանակություն ունի»,- ասված է հայտարարության մեջ:
