Մենք ոչ մեկին ոչ մի բան չենք տվել․ տալիս ես էն ժամանակ, երբ փաստաթուղթ ես ստորագրում․ Պապոյանը՝ տարածքներ զիջելու մասին

ԱԺ ՔՊ-ական պատգամավոր Գևորգ Պապոյանը, որին որոշել են նշանակել էկոնոմիկայի նախարար, Mediahub-ի հետ զրույցում խոսելով բոլորին անխտիր հարկելու և տուգանելու պետության քաղաքականությունից, ասաց, որ իրենց համար տուգանքը առաջնային չէ, իրենց համար կարևոր է մարդու կյանքն ու առողջությունը։

Քաղաքացու կյանքն ու առողջությունը կարևորող իշխանության ներկայացուցիչ Պապոյանին հիշեցրինք, որ իրենց իշխանության օրոք հազարավոր մեր քաղաքացիներ զոհվեցին Արցախում, ու պատերազմից հետո էլ շարունակվում են զոհերը, որովհետև իրենց իշխանության համար Հայաստանի սահմանները պահող կյանքն ու առողջությունը, փաստորեն, այնքայն կարևոր չէ, որ այդ զինվորին պահում են անմխիթար պայմաններում, հյուղակներում, որտեղ այդ նույն զինվորները հրդեհի զոհ են դառնում և այլն, մեր սահմաններն այնքան խոցելի են թշնամու համար, որ ամեն օր կարողանում են կրակել ու մարդ սպանել ու այսպես շարունակ:

«Ցավոք սրտի, անկախության պատմության ողջ ընթացքում այսպես կոչված ոչ պատերազմական հատվածներում մենք ունեցել ենք հազարից ավելի զոհեր։ Այսինքն՝ էդ սողացող պատերազմը, որ էդպես անունը դնում ենք «խաղաղության դարաշրջան և այլն», էդ ամեն տարի 70 զոհ էլ ենք ունեցել, 50 զոհ, 30 զոհ, 100 զոհ․․․․ Ցավոք սրտի, դա միշտ է եղել։ Եւ շատ կարևոր մի բան ասեմ. բա որ էսքան խոսում ենք խաղաղության պայմանագրի, բա որ էսքան խոսում ենք խաղաղության անհրաժեշտությունից, դուք էլ էդքան դրա համար մեզ քննադատում ենք, ինչի՞ համար ենք ասում»,-ասաց Պապոյանը։ 

-Մենք ձեզ քննադատում ենք, որ արժանապատիվ պետք է լինի այդ խաղաղությունը, որ անընդհատ չզիջենք ու տեղը ոչինչ չստանանք։

-Մենք դրա համար ենք անում, որ այ էդ զոհերը չլինեն։

-Անընդհատ զիջելով խաղաղության հնարավո՞ր է հասնել։ Անընդհատ զիջենք, անընդհատ խնդրենք, մուրանք խաղաղություն, ասենք՝ էլի կտանք, էլի կզիջենք․․․ 

-Ոչ, չենք զիջում։ Եթե Դուք ճիշտ լինեիք, մենք հիմա զիջած կլինեինք ու խաղաղություն կլիներ։ Մենք հիմա չենք զիջել, խաղաղություն չունենք, որովհետև բանակցում ենք, որ չզիջենք։ 

-Ի՞նչը զիջած կլինեինք կոնկրետ, էլ ի՞նչ է մնացել զիջելու։ 

-Մենք Հայաստանի Հանրապետության կարմիր գծերից ներս գտնվող ոչինչ չենք զիջել։ 

-Հիշեցնեմ, որ Գորիս-Կապան մայրուղին զիջել եք, Սև լճի «էն 30 տոկոսը» զիջել եք, Շուռնուխից ու Որոտանից մի հատված զիջել եք․․․

-Հայաստանի Հանրապետության տարածքը, որը միջազգայնորեն ճանաչված է, որևէ փաստաթղթով մենք ոչինչ չենք զիջել։ Ավելին, «խաղաղության պայմանագիրը» ինչո՞ւ չի կնքվում։ Իսկ կարո՞ղ է էն պատճառով չի կնքվում, որ դեռևս մի շարք գյուղերի տարածքներ կան, որ դեռ օկուպացված է, և Ադրբեջանը պետք է դուրս գա էդ գյուղերի տարածքներից։ 

-Մե՞ր տարածքներից։ 

-Այո։ Հրապարակային խոսել ենք ու բանակցությունների ժամանակ էլ խոսում ենք դրա մասին։ 

-Ալիևը հրապարակային Երևանն էլ է ուզում, և այդ մասին քանիցս հայտարարել է, բայց ես ուզում եմ հիշեցնել, որ Գորիս-Կապան մայրուղին երեսուն տարի մերն է եղել, և որևէ մեկը այդ մասով չի վիճարկել։ Բայց ձեր իշխանության օրոք ադրբեջանցիները GPS սարքով եկան ու Գորիս-Կապան մայրուղին սարքեցին Ադրբեջան։ Այսինք՝ դուք զիջեցիք, ընդ որում՝ բանավոր համաձայնությամբ։

-Ես կրկնում եմ, որ ամեն ինչ պետք է տեղի ունենա քարտեզներով։ Եւ եթե քարտեզներով ինչ-որ բան պատկանում է մեզ, պետք է լինի մերը։

-Այսինքն՝ մենք երեսուն տարի օկուպացրե՞լ էինք Գորիս-Կապան մայրուղին, քարտեզով մե՞րը չէր այդ ճանապարհը։ 

-Պետք է քարտեզով նայենք։ 

-Իսկ ինչո՞ւ տվեցինք, եթե պիտի քարտեզով նայեինք։ Նայեինք, հետո տայինք։ Երևանն էլ, կարող է պարզվի, «քարտեզով մերը չէ»՝ ըստ Ադրբեջանի, ի՞նչ անենք, տա՞նք։ 

-Տեսեք, եթե Դուք էդպիսի քարտեզ գիտեք, որ․․․․ Ես արդեն ասացի, մենք արդեն հիմա մտանք մի դաշտ, որտեղ․․․

-Որտեղ Ձեր դիրքերը թույլ են։

 -Չէ, մեր դիրքերը շատ ուժեղ են, ուղղակի ես չեմ կարող Ձեզ նման ոչ պրոֆեսիոնալ ու էմոցիոնալ գնահատականներ տամ, որովհետև ներկայացնում եմ պետություն։

 -Ես պրոֆեսիոնալ հարցադրում եմ անում՝ Գորիս-Կապան մայրուղին ի՞նչ հիմքով մերը չէր, որ տվեցինք իրենց։ 

-Մենք ոչ մեկին ոչ մի բան չենք տվել․ տալիս ես էն ժամանակ, երբ փաստաթուղթ ես ստորագրում։

-Այդ դեպքում ինչպե՞ս հայտնվեց Ադրբեջանը այդ մայրուղու վրա։

-Շնորհակալություն, ցտեսություն Ձեզ։ 

Վահե Մակարյան