Հայկական հյուրընկալության էությունը. մշակութային գոհարներ Երևանից դուրս
ՄՇԱԿՈՒՅԹ
Repatarmenia.org-ը գրում է, որ Հայկական հյուրընկալությունը, որը խորապես արմատավորված է հայերի մշակութային հյուսվածքում, իր ջերմությամբ տարածված է նաև Երևանի աշխույժ փողոցներից շատ հեռու: Մայրաքաղաքից դուրս կենդանանում է հայկական հյուրընկալության և առատաձեռնության իսկական ոգին: Այդ ոգին կիսում են այնպիսի հայրենիք վերադարձածներ, ինչպիսիք են Գայանե Խաչատրյանը և Սիսիան Պողոսյանը, որոնք վերադառնալով Հայաստան հարստացրել են հյուրանոցային ոլորտն իրենց յուրահատուկ փորձառություններով:
Ավստրալիայի Սիդնեյ քաղաքից ներգաղթած Գայանե Խաչատրյանը պատմական Գոշ գյուղում գտնվող Balkonum Luxury Guesthouse-ի հիմնադիրն է, որը շքեղության շունչ է հաղորդել հայկական գյուղերին: «Շքեղ հյուրատան գաղափարը նորություն էր տեղացի ճանապարհորդների համար», - կիսվել է նա: Տավուշի մարզի գեղատեսիլ բնապատկերների ֆոնի վրա գտնվող հյուրատունը նրբագեղության և հարմարավետության օրինակ է։ «Մեր հաստատության որակն ու դիզայնը հաճախ զարմացնում են մեր հյուրերին»,- ավելացրել է Գայանեն ընդգծելով գերազանցության հասնելուն իր նվիրվածությունը:
Սիսիան Պողոսյանը՝ մեկ այլ վերաբնակիչ, ով այժմ գլխավորում է Հայաստանի Զբոսաշրջության պետական կոմիտեն, կիսվել է ոլորտի աճի մանրամասներով։ «2023 թվականը շրջադարձային տարի էր հայկական զբոսաշրջության համար և նկատվեց զբոսաշրջիկների թվի զգալի աճ»,- ասել է նա։ Սիսիանը հպարտանում է նրանով, որ 2023 թվականի առաջին 10 ամիսներին եղել է ավելի քան երկու միլիոն զբոսաշրջիկների ռեկորդային հոսք, ինչը 22 տոկոսով ավելի է, քան նախորդ տարի։ «Հայաստանի գրավչությունը կայանում է նրա հնագույն ժառանգության, ձեռք չտված բնության, գեղատեսիլ բնապատկերների, ջերմ հյուրընկալության և հարուստ խոհարարական առաջարկների մեջ: Եվ այդ ամենը մատչելի գներով: Հայաստանը դրական մթնոլորտով հիանալի վայր է, և զբոսաշրջիկներին անմոռանալի հիշողություններ է պարգևում»,- ասել է նա։
Հյուրընկալության հայկական ավանդույթները, որոնք խորապես ներդրված են հայերի մշակույթի մեջ, վկայում են այն համոզմունքի մասին, որ յուրաքանչյուր հյուր երկնքից եկած նվեր է: Այդ սկզբունքը հատկապես ակնհայտ է հեռավոր քաղաքներում և գյուղերում, որտեղ հյուրերին հաճախ գրկաբաց են ընդունում, հյուրասիրում համեղ ուտեստներով և պատմում հայկական ժառանգությամբ հարուստ պատմություններ: Տեղական խոհանոցի առատաձեռն չափաբաժինները հյուրընկալության այդ ոգու մարմնացումն են: Հայաստանում հյուրասիրությունը պարզապես ծառայություն չէ, այն ապրելակերպ է, որտեղ յուրաքանչյուր հյուր դառնում է մեծ, բարեսիրտ ընտանիքի անդամ:
Նյութը հրապարակման պատրաստեց Կամո Խաչիկյանը
