Տեղի է ունենում բանակցային ֆորմատի փոփոխություն. Չգիտեմ՝ Ինչ կարող է տալ Գերմանիայի միջնորդությունը ՀՀ-ին. Խաչատրյան

Նույն օրինաչափությունն է, ինչ 2018-2020 թվականներին Փաշինյան-Ալիեւ գաղտնի կամ չհրապարակված բանակցությունների ժամանակ, երբ Ադրբեջանը հայտարարում է հանդիպման մասին, հետո ստիպված հայկական կողմը եւս ընդունում է այդ փաստը: Այս մասին, այսօր՝ փետրվարի 19-ին, ԱԺ-ում լրագրողների հետ զրույցում նշեց ԱԺ «Հայաստան» խմբակցության պատգամավոր Արթուր Խաչատրյանը՝ անդրադառնալով Մյունխենում երկու երկրների ղեկավարների հանդիպմանը:

«Դա բերեց Մինսկի խմբի  շրջանակներում բանակցությունների ձախողմանը, եւ դա բերեց պատերազմի: Ի՞նչ կբերի այդ նույն վարվերալձեւի կրկնությունը, շատ դժվար է այսօր ինչ-որ բան ասել:

Մենք տեսնում ենք, որ տեղի է ունենում բանակցային ֆորմատի փոփոխություն, եթե իհարկե, բանակցություններ կան: Հայկական կողմը հրաժարվում է օգտվել ռուսական առաջարկից, Ադրբեջանը Արեւմուտքում ստանալով այն, ինչ ցանկանում էր, հրաժարվում է մեկնել արեւմտյան հարթակներ: ԱՄՆ-ն հայտարարում է, որ իրենք խրախուսում են հայ-ադրբեջանական շփումները, ավելի պարզ դա նշանակում է, որ ձեռքերը լվանում են այդ գործընթացից, ասում են՝ գնացեք, ինչ ուզում եք արեք, մենք ոչ միջնորդ ենք, ոչ՝ երաշխավոր: Ինչ վերաբերում է Գերմանիային, Գերմանիան ու Թուրքիան սերտ համագործակցում են, ու ես չգիտեմ՝ ի՞նչ կարող է դա տալ Հայաստանին»,-ասաց նա:

Խաչատրյանի խոսքով՝ ի տարբերություն Փաշինյանի՝ Ալիևը բոլոր հարթակներում կարողանում է ստանալ այն, ինչ իրեն պետք է, իսկ Փաշինյանն ամեն տեղ պարտվում է։

«Անկախ դրանից, թե բանակցությունների սեղանը որտեղ է դրված, միջնորդն ով է, եթե երկրի ղեկավարն ի զորու չէ պաշտպանել երկրի շահերը, ուզում եք բանակցությունների սեղանը լուսնի վրա դրեք։ Այն, որ Փաշինյանն աշխատում է այս երկրի դեմ, կասկածի տեղիք չի թողնում»,-ասաց նա։