ԵՄ-ն հայտարարել է եվրոպական պաշտպանական արդյունաբերության զարգացման անհրաժեշտության մասին
ՔԱՂԱՔԱԿԱՆՈՒԹՅՈՒՆ
Եվրահանձնաժողովը երեք շաբաթվա ընթացքում կներկայացնի պաշտպանական արդյունաբերական ռազմավարության առաջարկը, Մյունխենի անվտանգության համաժողովում ասել է Ուրսուլա ֆոն դեր Լեյենը։
Եվրահանձնաժողովի ղեկավարը հայտարարել է նաեւ Ուկրաինայում պաշտպանական ինովացիոն գրասենյակի բացման մասին, հայտնում է Euronews-ը։
Նոր միջոցառումները կներառեն պաշտպանական ծախսերի ընդհանուր աճ՝ ներառյալ համատեղ գնումները և ԵՄ համակարգերի փոխգործունակությունը բարելավելու միջոցառումները: Բացի այդ, ֆոն դեր Լեյենն ընդգծել է եվրոպական պաշտպանական արդյունաբերության զարգացման անհրաժեշտությունը։
«Եվրամիությունը պետք է ընդլայնի իր պաշտպանական արդյունաբերական բազան։ Եվ հետևաբար մենք պետք է բարելավենք պաշտպանական արտադրությունը... Եթե ես պահպանեմ Եվրահանձնաժողովի նախագահի պաշտոնը, կնշանակեմ պաշտպանության հարցերով եվրահանձնակատարի»,- ասել է Եվրոպական հանձնաժողովի նախագահ Ուրսուլա ֆոն դեր Լեյենը։
Ֆոն դեր Լեյենը նաև թույլ է տվել ռուսական սառեցված ակտիվներից ստացված միջոցներն օգտագործել Ուկրաինայի համար զենքի արտադրությունը ֆինանսավորելու համար։ Նրա խոսքով, Եվրահանձնաժողովն այդ նպատակով արդեն իսկ ստեղծել է իրավական դաշտ։ Փետրվարի 12-ին ԵՄ խորհուրդը հավանություն է տվել բանաձեւին, որը թույլ է տալիս ապագայում սառեցված ակտիվներից ստացված շահույթն օգտագործել Ուկրաինայի վերականգնման համար։
Միևնույն ժամանակ, Ուկրաինայի նախագահ Վլադիմիր Զելենսկին Մյունխենի համաժողովում հաստատել է զորքերի դուրսբերումը Ավդիիվկայից՝ մարդկանց «փրկելու» համար և կրկին հիշեցրել է Ուկրաինայի զինված ուժերի շրջանում զինամթերքի պակասի մասին։
«Ուկրաինային զենքի արհեստական պակասի մեջ պահելը, մասնավորապես՝ հրետանու և հեռահար զենքի պակասի մեջ, Պուտինին թույլ է տալիս հարմարվել ռազմական գործողությունների ինտենսիվությանը», - ասել է Զելենսկին։ «Մի հարցրեք Ուկրաինային, թե երբ կավարտվի պատերազմը, հարցրեք ինքներդ ձեզ, թե ինչու Պուտինը դեռ կարող է շարունակել այն»:
