Որ կուսակցությունները կմիանան հանրաքվեի «Ոչ»-ի ճամբարին․ «Հրապարակ»

«Հրապարակ» թերթը գրում է.  Հանրային ռադիոյին տված իր հարցազրույցում Նիկոլ Փաշինյանը հաստատեց, որ Սահմանադրությունը փոխելու օրակարգն Ադրբեջանի պարտադրանքն է, նաեւ ուրվագծեց, թե կոնկրետ ինչ է ցանկանում փոխել․ պատրաստվում է հրաժարվել ՀՀ հիմնադիր փաստաթղթից՝ Անկախության հռչակագրից։ Թեեւ դեռ իշխանությունները սահմանադրության տեքստ չեն պատրաստել, սակայն Նիկոլ Փաշինյանի խոսքից ակնհայտ էր, որ առաջիկայում կավարտեն նոր սահմանադրության տեքստի վրա աշխատանքները, եւ այն կդրվի հանրաքվեի: Իսկ դա նշանակում է, որ կձեւավորվի երկու ճակատ` «Այո»-ի ու «Ոչ»-ի, եւ կսկսվի քարոզչությունը սահմանադրությունն ընդունելու եւ այն մերժելու ուղղությամբ։ Մենք զրուցել ենք մի շարք քաղաքական ուժերի հետ՝ հասկանալու համար, թե կմիանա՞ն «Ոչ»-ի ճամբարին, եթե հանրաքվե, այնուամենայնիվ, նշանակվի։

«Հայ ազգային կոնգրես» կուսակցությունից Արմեն Խաչատրյանը հարցին, թե ՀԱԿ-ը կմիանա՞ «Ոչ»-ի ճակատին, կամ հնարավո՞ր է, որ հենց ՀԱԿ-ը ձեւավորի փաշինյանական սահմանադրությունը մերժողների ճակատ, պատասխանեց․

«Այն, որ Կոնգրեսը «Ոչ»-ի դիրքերում է, դա միանշանակ է, իսկ մնացած հարցերը` ընթացքում։ Պետք է դիտարկենք դեռ օրենսդրական հնարավորությունները»։

«Դեմոկրատական այլընտրանք» կուսակցության նախագահ Սուրեն Սուրենյանցը մեզ հետ զրույցում ասաց, որ կուսակցությունը, նախքան հնարավոր հանրաքվեն, նոր շարժում է պատրաստվում ձեւավորել. «Բնականաբար, կիմանանք «Ոչ»-ի ճամբարին, բայց ավելի սկզբունքային է հանրաքվեի նախաձեռնությունն առհասարակ կանխելը։ Մեր կուսակցությունը հաջորդ շաբաթ նախաձեռնելու է «Հանուն Սահմանադրության» շարժում։ Այդ նպատակով փետրվարի 13-ին նախաձեռնել ենք հանրային քննարկում»։

«Ապրելու երկիր» կուսակցության համահիմնադիր Մեսրոպ Առաքելյանը հարցին` կմիանա՞ն «Ոչ»-ի ճամբարին, ասաց, որ նախատեսվող փոփոխություններն իրենց կուսակցության համար անընդունելի են. «Ձեր նշած փոփոխությունները, անգամ դրանց քննարկումը, մեզ համար անընդունելի են, եւ կուսակցությունն ակտիվ պայքարելու է այդ փոփոխությունների դեմ՝ չբացառելով համագործակցությունը տարբեր ձեւաչափերով»։

Հանրապետական կուսակցության ներկայացուցիչ, «Պատիվ ունեմ» խմբակցության քարտուղար Հայկ Մամիջանյանն ասաց. «Իմ անձնական կարծիքն է` այն պահին, որ սահմանադրական փոփոխությունների թեման կեղծ օրակարգ է, որը միտված է շեղելու ուշադրությունը շատուշատ այլ օրհասական խնդիրներից, իմ վերաբերմունքն այդ հարցին այս պահին դա է։ Տեսնենք, թե ինչպես են իրադարձությունները զարգանում, Ձեր հարցի պատասխանն այդ ժամանակ կարող եմ տալ»։

Հայաստանի դեմոկրատական կուսակցության առաջնորդ Արամ Գասպարի Սարգսյանից եւս հետաքրքրվեցինք, թե ինչ դիրքորոշում ունի կուսակցությունը Սահմանադրությունը փոխելու հարցի առնչությամբ, ինչ գործողություններ է պատրաստ անել։ Արամ Սարգսյանը նախ նշեց, որ համաձայն չէ այն դիտարկման հետ, որ Սահմանադրության փոփոխության հանրաքվեն անխուսափելի է. «Մեր կուսակցությունը հստակ դիրքորոշում ունի, բայց մինչեւ դիրքորոշումը հայտնելը ես ուզում եմ ասել, որ ես Ձեզ հետ համաձայն չեմ, որ անխուսափելի է, որովհետեւ Նիկոլ Փաշինյանը նախ պետք է հասնի այդ օրվան, որ կարողանա հանրաքվե կազմակերպել՝ որպես կառավարող ուժ, դա մեծ հարցական է։ Բայց եթե հանկարծ հաջողվի իրենց այդպիսի հանրաքվե կազմակերպել, ապա դա լինելու է շատ մեծ դիմադրության ներքո, որովհետեւ դա կնշանակի, որ մենք մեր ազգային բոլոր գաղափարները դնում ենք մի կողմ եւ ենթարկվում ենք այս ապազգային իշխանության թելադրանքին։ Ես այստեղ, իմիջիայլոց, նաեւ տեսնում եմ վերջապես հնարավորություն՝ միավորելու բոլոր այն առողջ եւ նորմալ քաղաքական հայացքներ ունեցող, ազգային գաղափարախոսությամբ ընթացող ուժերին, որոնք հասկանում են, որ սա արդեն վերջն է»։

«Ազգային ինքնորոշում միավորում» կուսակցության առաջնորդ Պարույր Հայրիկյանը եւս ասաց, որ դեմ է Փաշինյանի հայտարարած փոփոխություններին, ավելին՝ նա կարծում է, որ Նիկոլ Փաշինյանը պետք է քրեական պատասխանատվության ենթարկվի։ «Ասեմ, որ մենք արդեն ձեւավորել ենք սահմանադրական բարեփոխումների հանրային խորհուրդ, շատ քաղաքական ուժեր հավաքվել են, եւ այս պահին աշխատանքներ ենք տանում մյուսներին ներգրավելու համար։ Առաջին գործը Նիկոլ Փաշինյանին քրեական պատասխանատվության ենթարկելու պահանջն է։ Դա մերկապարանոց չէ, մենք հիմնավորված հանրագիր ենք ուղարկել դատախազին։ Այնպես որ, գործն ավելի լուրջ է, քան Նիկոլ Փաշինյանի անձնական նախաձեռնությանն «այո» կամ «ոչ» ասելը։ Նիկոլ Փաշինյանը գնալու է բանտ»,- ասաց Հայրիկյանը։

«Քաղաքացու որոշում» կուսակցության ԳՄ քարտուղար Գոռ Հակոբյանն էլ ասաց. «Առաջիկայում մեզ մոտ այդ հարցի հետ կապված քննարկում է լինելու, եթե դիրքորոշում լինի, հրապարակային կծանուցենք, դրա համար այս պահին շատ բան չեմ կարող ասել»։ Հարցրինք՝ կուսակցությունն ի՞նչ վերաբերմունք ունի Սահմանադրությունը փոխելու գաղափարի վերաբերյալ։ «Խնդիրը Սահմանադրության փոփոխության մեջ չէ, այլ Սահմանադրության փոփոխության բովանդակության մեջ է»,- ասաց ՔՈ ԳՄ քարտուղարը։

Առավել մանրամասն թերթի այսօրվա համարում