«Կարելի է գրազ գալ». Ռազմական վերլուծաբանը աշխարհի ամենաուժեղ բանակների վարկանիշների վերաբերյալ
ՎԵՐԼՈՒԾՈՒԹՅՈՒՆՆԵՐ
Radiosputnik.ru-ն գրում է, որ ըստ ամենամյա Global Firepower Index-ի աշխարհի 145 երկրների շարքում ուժեղագույն բանակների վարկանիշում Ռուսաստանը երկրորդ տեղն է զբաղեցրել ԱՄՆ-ից հետո։ Վարկանիշը հիմնված է PowerIndex ցուցանիշի վրա և հաշվարկված է ավելի քան 60 գործոններով՝ զորամասերի քանակից ու ֆինանսական վիճակից մինչև նյութատեխնիկական ապահովման հնարավորություններ և աշխարհագրություն։ Վարկանիշի երրորդ տեղում չինական բանակն է։ Առաջին հնգյակում ընդգրկվել են նաև Հնդկաստանի և Հարավային Կորեայի բանակները։
Sputnik ռադիոյի եթերում Ռազմաքաղաքական վերլուծության բյուրոյի ղեկավար Ալեքսանդր Միխայլովը մեկնաբանել է այդ տվյալները։ ««Ամենաուժեղ» սահմանմանը ես ամենևին չեմ վստահում, ես այն կբաժանեի երկու մասի՝ աշխարհի ամենամարտունակ բանակը և աշխարհի ամենահզոր բանակը իր սպառազինությամբ ու քանակով: Այդ երկու վարկանիշները կլինեն ամենաօբյեկտիվը»,- կարծում է ռազմական վերլուծաբանը։
Նրա կարծիքով անհրաժեշտ է նաև հաշվի առնել պոտենցիալ ռազմական հակամարտության բնույթը, և եթե խոսենք միջուկային հակամարտության մասին, ապա Ռուսաստանն ունի անհերքելի առավելություններ, նշել է Միխայլովը։ «Եթե մենք խոսում ենք միջուկային բաղադրիչի մասին, ապա Ռուսաստանն ունի ամենամեծ միջուկային ներուժը, մենք ունենք ամենահզոր և ամենաարագ հարվածի համակարգերը: Ռուսաստան-ԱՄՆ զույգից միայն Ռուսաստանն ունի հիպերձայնային համակարգեր, ներառյալ միջուկային զենքը: Եթե լինի միջուկային հակամարտություն, իհարկե, երկու կողմերն էլ կպարտվեն, բայց Ռուսաստանը մի քանի րոպե ավելի շուտ անխուսափելի պարտություն կպատճառի իր թշնամուն, քան ԱՄՆ-ը դա կանի Ռուսաստանի դեմ»,- ընդգծել է ռազմական վերլուծաբանը։
Եթե խոսենք ոչ միջուկային հակամարտության մասին, ապա այստեղ էլ ամենամարտունակ բանակը ռուսականն է, համոզված է նա։ «Ինչ վերաբերում է ոչ միջուկային հակամարտությանը, ապա դա կարելի է շատ երկար վերլուծել և հաշվարկել տարբեր ցուցանիշներով: Բայց եթե խոսենք մարտունակության մասին, ապա այժմ մոլորակի ամենամարտունակ բանակը, իհարկե, դա ռուսականն է, որովհետև հենց ռուսական բանակն է, որն այժմ ունի ավելի քան 600 հազար զինվորականներ որպես պատերազմող ուժ։ Ռուսական բանակն է, որ ռոտացիայի միջոցով մարտական փորձ է տրամադրում իր բանակի նոր զինծառայողներին, և այդ գործընթացը շարունակվում է գրեթե երկու տարի»,- պարզաբանել է Ալեքսանդր Միխայլովը։
Աշխարհի ամենահզոր բանակի վարկանիշը կարելի է բաժանել Չինաստանի և ԱՄՆ-ի բանակների միջև, կարծում է նա։
«Երբ մենք խոսում ենք հզոր բանակի մասին, այսինքն հաշվում ենք այդ բանակների զինանոցներում առկա անձնակազմի և սպառազինությունների քանակը, ապա, հավանաբար, մոլորակի երկու ամենահզոր բանակներն են չինականը և ամերիկյանը: Եվ ահա թե ինչու դժվար է, իմ կարծիքով, ասել, թե ով է ավելի ուժեղ, քանի որ չինական բանակը թվով ավելի մեծ է, նրա նավատորմն ավելի ներկայացված է, և ընդհանրապես նա մեծապես մեծացնում է իր ռազմական ներուժը։ Չինաստանը բաց ցուցանիշներ չունի աճի վերաբերյալ, նրանք գաղտնի են պահում այդ բաները ի տարբերություն ամերիկացիների, որոնք, ընդհակառակը, փորձում են ավելի բարձրաձայնել իրենց պաշտպանական բյուջեի և ծախսերի մասին: Հետևաբար, դա վիճելի հարց է: Հնարավոր է, որ չինական բանակը ուժով արդեն գերազանցում է ամերիկյանին»,- եզրափակել է Ալեքսանդր Միխայլովը։
Նյութը հրապարակման պատրաստեց Կամո Խաչիկյանը
