Հարավային Կովկասի խոշորագույն տնտեսությունը ցույց է տվել սպասվածից ավելի համեստ տնտեսական աճ
ՎԵՐԼՈՒԾՈՒԹՅՈՒՆՆԵՐ
Eadaily.com-ը գրում է, որ անցյալ տարի Ադրբեջանը ունեցել է 123 մլրդ մանաթի համախառն ներքին արդյունք (72,35 մլրդ դոլար) կամ 1,1%-ով ավելի, քան մեկ տարի առաջ։ Այս մասին են վկայում երկրի վիճակագրության պետական կոմիտեի հրապարակած տվյալները։
Հաշվետու ժամանակահատվածում Ադրբեջանի տնտեսության նավթագազային հատվածում ավելացված արժեքը նվազել է 1,7%-ով, իսկ ոչ նավթային և գազային հատվածում աճել է 3,7%-ով։
Վիճակագրական տվյալների համաձայն ՀՆԱ-ի 40,5%-ը ստացվում է արդյունաբերությունից, 10%-ը առևտուրից, տրանսպորտային միջոցների վերանորոգումից, 6,2%-ը տրանսպորտից և պահեստավորումից, 6,2%-ը շինարարությունից, 5,5%-ը գյուղատնտեսությունից, անտառտնտեսությունից և ձկնորսությունից, 2,2%-ը զբոսաշրջիկների տեղավորման և հասարակական սննդի ոլորտից, 1,7 %-ը տեղեկատվության ու կապի ոլորտից և 18,6 տոկոսը այլ ոլորտներից։
Հարավային Կովկասի խոշորագույն տնտեսությունում մեկ շնչին ընկնող ՀՆԱ-ն գերազանցել է 12100 մանաթը (7120 դոլար)։
2023 թվականին Ադրբեջանում հիմնական միջոցներին է ուղղվել 20 միլիարդ 296,6 միլիոն մանաթ (11,9 միլիարդ դոլար), կամ 9,8 տոկոսով ավելի շատ միջոցներ, քան 2022 թվականին։ Անդրկովկասի այդ հանրապետության նավթագազային հատվածում ներդրումների ծավալն աճել է 10,9%-ով, ոչ նավթագազային հատվածին հատկացված միջոցների ծավալը աճել է 9,3%-ով։
Ադրբեջանի Կենտրոնական բանկի նախորդ տարվա վերջին կանխատեսումների համաձայն 2024 թվականին հանրապետությունում իրական տնտեսական աճի տեմպերը կկազմեն մոտ 3−3,5%, ընդ որում ոչ նավթագազային հատվածում ակնկալվում է 5−5,5% աճ։ 2023 թվականի վերջին Ադրբեջանի ֆինանսական կարգավորիչը կանխատեսել էր ՀՆԱ-ի աճ 1,5% մակարդակում։ Հիմա պարզվում է, որ երկրի տնտեսությունն էլ ավելի համեստ աճ է ցույց տվել։
Նյութը հրապարակման պատրաստեց Կամո Խաչիկյանը
